العناية بالشعر المصبوغ

Tuesday, January 23, 2018




أهلا بنات كيفكم
اليوم موضوعنا يهم كثير بنات ومطلوب كثير
اللي هوا طريقة العناية بالشعر المصبوغ
اول شي انا شعري مصبوغ أشقر رمادي على زيتي
خلطة بين الاثنين 
فالشعر شوي متضرر لان اللون هذا صعب و يحتاج رنساج شهريا 
الي تحب تعرف طريقة الرنساج الي اسويها راجعي هذا الموضوع 
فاللي حابة شعرها هذا اللون لازم تعرف انه يبغاله عناية قصوى


الشامبوهات :

اول شي الامتناع عن الشامبوهات العادية التجارية الحارة على الشعر
 استعملي شامبو للشعر المصبوغ خالي من الصوديوم سولفيت الي يغير لون الصبغة (يفضل)
 او الشامبو المخصص للشعر المعالج بالكيراتين و البروتين لانه لطيف وخفيف على الشعر (يفضل بدون زيوت عشان ما يغير اللون و يقلبه)
وافضل شي ممكن تستعملي الشامبو الي لونه موف عشان يحافظ على لون الصبغة

 وبشارككم الشامبوهات الي جربتها حسب طلب الأغلبية في سناب شات



Deep Rose 
شامبو ماركة ديب روز اخدته من صيدلية النهدي محد مدحلي اياه ولا شي شفته و قررت اجربه
 حبيته جدا يحافظ على رطوبة الشعر و يخفف من النفشة و التشابك قزازته موف بس من جوا لون الشامبو ابيض انخدعت شويه حسبته موف بس اهم شي ارتحت عليه 


ثاني شامبو جربته من نزيه ماركتهم الخاصة الي اسمها انيرجي الشامبو هذا مخصص للشعر المعالج بالكيراتين ممتاز جدا نفس الي قبله و الصراحة انا احول بين الاثنين حسب المتوفر قدامي ما عندي صورة له لكن هذا الرابط 


ثالث شامبو وبلسم جربتهم ماركة صن سيلك لكن اللون البرتقالي النوتري كيراتين ممتاز كمان ويخفف من التشابك حبيته و استعمله حتى قبل ما اصبغ شعري كمان ما عندي صورة له غير ريفيو قديم سويته عنه ب٢٠١٢ في هذا الرابط


رابع شي جربته شامبو لاكمي على قد ما مدحوه ما قدرت استعمله ابدااااااااا يخلي شعري جدا ناشف بشكل مو طبيعي  فما حبيته ابدا تلاقوه بمحلات ادوات التجميل و الصالونات يخلي ملمس شعري متليف ومتشابك وخشن وما يتمشط


خامس شامبو جربته و افضلهم واللي ماشيه عليه اسمه شيمر لايتس Shimmer Lights راائع يثبت اللون بشكل جميل جدا جدا طريقته تخليه على الشعر شويه فيصحح لون الشعر ومعاه بلسم نفس النوع برضو تتركينه على شعرك ٥..١٠ دقايق و يضبط لون الشعر لو كان قالب شوية بنفس الوقت احس شعري فيه ترطيب ومافي جفاف فكثير حبيته و مستمره عليه  اخذته من اكاونت @Hutaf_shop في انستقرام



مثبت اللون :

كل اسبوع او اسبوعين حسب كثرة غسيلي لشعري و قد ايش بدا اللون يقلب استعمل ماسك تثبيت اللون 
اخدته من وفاء سنتر بس اتوقع تلقونه بامازون لونه موف طريقته بعد غسيل الشعر يتجفف بمنشفة و يتحط الماسك بالتساوي من الجذور لللاطراف ويتوزع بالمشط و اتركه ١٠ دقايق بعد كذا اغسله مو بس يثبت اللون لكن كمان ينعم بشكل رهيب يخلي الشعر سهل التسريح ويفضل ما تستعملينه اذا عندك مناسبة و بتسشوري شعرك لانه بينعم لدرجة يخليه ملصق 
و كمان شامبو وبلسم شيمر لايتس يؤدون نفس الغرض 



الماسكات : 

بالنسبة للماسكات جربت ٢ ومرتاحة عليهم

الاول ماسك البروتين الي ينباع في صالون وفاء سنتر الي صابغة شعري عندهم الماسك هذا رهيييييييب يرطب الشعر من قلب و يسهل تسريحه ويخفف من النفشة و الجفاف يتحط على الشعر الجاف ينترك ربع ساعه و احيانا انام فيه و اغسل شعري ثاني يوم نعومه و ترطيب حلووووة بس عيبه السشوار بعده يلصق و الشعر طايح مافيه فوليوم اذا عندي مناسبة ما احطه

الثاني ماسك من ديب روز الي من النهدي ترطيب عميق حلو بس اقل من ماسك البروتين بشويه احطه على شعري بعد ما  اغسله اخليه ربع ساعه و اغسله مرة ثانية 


القص :

عشان تحافظي على مظهر الشعر انه صحي و كثيف لازم قص اطراف بعد كل مره تصبغي يدي حيويه لشكل الشعر 


التسريح : 

حاولي قد ما تقدري تبعدي عن الحراره العاليه لانها تفتح لون الشعر بسرعه واذا فتح يوصل مرحلة اللون البرتقالي و يسير تحتاجي رنساج من جديد

نوع المشط يفرق :

دايما دايما انصح بمشط The Wet Brush تلاقوه بصيدلية وايتس و سعره جدا رخيص بحدود ال٤٠ ريال بس حقيقي يفرق لدرجه اشيله معايا الصالون لمن بسوي شعري ما يقطع الشعر ويسرح بلطف وما يخليك معصبة وانت تمشطي لان الشعر المصبوع بيكون جاف ومتشابك بس مع هدا المشط الوضع غير بيفك كل التشابك بسهوولة وسلاسة حتى زوجي مرة حبه وما سار يستعمل غيره البيت مليان منه حقيقي يستحق تجربوه على ضمانتي اخدته من امازون هذا الرابط بس زي ما قلتلكم موجود بواتيس ب٤٠ ريال

العلاجات في الصوالين :
اكثر شي استفدت منه جلسات الفيلر من براند Morphosis فكرته يعبي الفراغات بالشعره اي تكسر و تقصف يمليه يخلي الشعر سهل التسريح و شكله صحي وفيه لمعة و يرطب يتسوى على عدة جلسات بدون حرارة سويت ٤ جلسات في صالون هايلايتس Highlights  مهم قبل ما تسووه تبحثوا اونلاين كيف يتسوي وتتاكدوا ان الصالون الي بتروحوه راح يسويلكم هوا بالطريقة الصح هذا الفيديو في اليوتيوب من نفس الشركة حيساعدكم اضغطي هنا عشان تشوفيه

الشي الثاني المفيد جدا جلسات الاولابلكس تحل شوية من الضرر الي الصبغة و سحب اللون سووه بشعرك فكرتة يعيد الكونكشن الي بين روابط الشعر الي اتكسرت عند سحب اللون ومهم كمان الي تصبغلك شعرك تحطلك هوا مع الصبغة عشان تقلل الضرر يوجد منه اكثر من منتج نوع ينحط مع الصبغة لمن تصبغي ونوع تحطيه كجلسات في الصالون على شعرك انصح فيه جدا مفيد للشعر

اخيرا اتمني انكم تكونوا استفدتوا لانه تجيني كثير اسأله بخصوص هذا الموضوع


You Might Also Like

0 comments