الدليل السياحي إلى بودروم

Tuesday, July 11, 2017



مدينة ساحلية تبعد ساعة عن اسطنبول بالطيارة ينفع تروحولها بالسيارة اتوقع بس اناا افضل الطيارة
في اكثر من طيران يودي عليها جربت التركي مرة وجربت اونر اير كلهم كويسين 
الطيران الداخلي في تركيا سلس واجرائات المطار سهلة جدا وما يدققوا لا في وزن زايد ولا محتويات الشنطة و السوائل
تعاملهم لطيف جدا و اخلاقهم حلوة

(منطقة توركوبوكو)

كيف الناس في بودروم؟
الناس في بودرم ماخدين اطباع اليونانيين لانه قريبين منهم مره مرحبين و اخلاقهم تجنن و فرندلي لابعد درجة

كيف درجة الحرارة ؟
بالنسبة لدرجة الحرارة هي مصيف يعني لازم تكون حر . طول السنة الجو لطيف ومن الربيع للصيف حر و ما انصح بزيارتها طول السنة لانه تكون هادية زيادة عن اللزوم و بعض المطاعم تقفل فيها زي زوما و فينيكس موجودين بس بالصيف

هل تصلح لعوائل ؟
تصلح حسب اختيار الفندق و الاماكن الي تروحوها لان فيها كل الخيارات

(توركوبوكو)

في اكثر من منطقة في بودروم ايش الفرق بينهم؟

Gumbet
اقرب منطقة لداون تاون بودروم او السيتي سنتر ما قد نزلت بفندق فيها لانها ماعجبتني

Bitez
ايضا من اقرب شاطي او منطقة للداون تاون فيها فنادق متوسطة الاسعار جرب فيهم قراند يازيكي و رمادا
المنطقة مانالت اعجابي كثير شعبيه بزيادة و شواطئها مو مرة حلوة 

Yalikavak
منطقة ياليكافاك وفيها بالمرينا من المناطق الجديدة اول مرة جيت بودروم في ٢٠١٤ كانت دوبها فاتحة وفي هذه الزيارة المنطقة كبرت و اتيطورت كثيييير
بالمرينا في منطقة ياليكافاك زي بورتو بانوس في ماربيا
المنطقة حلوة و نظيفة انظف شي في بودروم فيها مطاعم مرتبة زي زوما فينيكس و نصرت وفتح فيها كافيه هوكا المشهور في اسطنبول و بوتيكات حلوة و مرسى اليخوت مليان يخوت فخمة 

Torba
اكثر منطقة افضلها للسكن لانه احسن الفنادق و المنتجعات فيهم 

Turkubuku 
قطعة من ايطاليا في تركيا كاني في بوسيتانو ساحل ممتد اسفل سفوح جبال المنظر فيه خيالي تشوفي البيوت علي ارتفاع الجبل في مطاعم بحرية كثير حلوة و كل مطعم الذ من الثاني وفيها بوتيكات محلية تبيع قطع مميزة المنطقة جدا ساحرة بجمالها ما تشبعي من النظر فيها اشهر الفنادق فيها فندق ديفان
لاتفوتو العصرية في هذه المنطقة ساحرة جدااااا و فيه بعض البيتش كلبز و الشواطيء
يكثر فيها اللوكالز اي الاتراك المواطنين و المشاهير الاتراك

Gumusluk
تشبه توركبوكو كثير ونفس الفكرة ما سنحتلي الفرصة ازورها من اشهر المطاعم فيها مطعم بحري اسمه ميموزا

السيتي سينتر او داون تاون بودروم
المنطقة كلها مطاعم محلية و كافيهات و بارات وكلبات مزعجة جدا والاصوات فيها عالية وفيها مارينا يخت كلب كل يوم في عروض غنائية ورقص جربت اكلهم ماحبيته بس ما يمنع تزوروه لانه شي مهم عندهم وحلو تجربونه و بالنهاية الناس اذواق ممكن يعجبكم الاكل بس عموما لازم تزورو المنطقة وتشوفوها 

(المنظر من المالديف سويت في فندق The Bodrum By Paramount)

ايش في نشاطات؟
سباحة تشميس العاب بحرية مافيها تسوق ولا ملاهي علي حد علمي 

كم يوم يكفيني في بودروم؟
٥ ايام اشوفها كافية وافية كل يوم تقضيه بمنطقة

كيف اروح من منطقة للثانية ؟
بالتاكسي او اوبر و الانتقال من منطقة لمنطقة جدا مكلف لان المناطق بعيدة عن بعض و عداد التاكسي او اوبر اغلي بكثير من اسطنبول تقريبا ٣ ادبال 
ايجار سيارة احسه صعب شوية لان الطريق زي صفوح الجبال وما تمر الا سيارة واحده فيخوف شوية 
علي سبيل المثال كنت لمن اروح من فندق في توربا لياليكافاك تقريبا روحة مع رجعه ٣٠٠ ليرة
وللسيتي سنتر تقريبا المشوار الواحد من ٨٠ الي ١٠٠ ليرة

(مالديف سويت في فندق The Bodrum By Paramount)

كيف الاسعار؟
اكثر سوال يجيني والصراحة انا بالنسبة ليا ماله اجابه لان كل شي انت تحددينه بميزانيتك و اختياراتك في اي بلد بالعالم
ممكن تسكني في فندق الليلة ب ٣ الاف وممكن الليلة ب ٣٠٠ وممكن تاكلي بمطاعم محليه رخيصه لشخصين ب ٨٠ ليرة وممكن في مطاعم فخمة لشخصين ب ٥٠٠ ليرة  انت تحددين كل شي باختياراتك افتحي مواقع حجز الفنادق و اطلعي عليها و اختاري الي يناسبك بس اكيد لو اخترتي غرفة بمسبح خاص بيكون السعر مرتفع شوية زي اي مكان بالعالم لانك تدفعين ثمن خصوصيتك 

هل في مسابح خاصة و اماكن خاصة للنساء وخصوصية؟
من جديد يرجع لاختيارك نزلت بفندق باراماونت الي كان سابقا جميرة واخترت جناح بمسبح خاص وكان في خصوصية تامة فانت تدورين بنفسك وتشوفين الي يناسبك بالنسبة لمسابح خاصة بالنساء فهذا الشي ماكان موجود 

اقدر اروح مدن قريبة او جزر ؟
تقدري تروحي اليونان عن طريق البحر لجزيرة كوس ومن كوس لسنانتوريني او ميكونوس و تقدري من بودروم دايركت تروحي علي جزيرة كريتي اليونانية عن طريق البحر ايضا

(فندق Nikki Beach و المنظر من الغرفة واضح فيه ال Deck او السقالة الي على البحر وتشوكلت هدية عند التشك ان)

 ايش الفنادق الي جربتيها؟ و رايك عن كل واحد؟
قراند يازيكي  : فيه فرعين فرع صغير علي البحر دايركت ما قدرت اجلس فيه دقيقه كله حشرات فطلبت منهم ينقلوني علي الفرع الاكبر الي مافيه شاطيء مكانه فوق الجبل  متوسط المستوي ماعجبتني خدمتهم وانهم اعطوني سريرين سنقل ملصقه في بعض مع ان حجزي سرير كبير غير كدا حجزي بفيو واعطوني غرفة داخليه الفندق باين محلي و ما اعرف ليش
ما حبيته ابدا المسبح كان حلو و بانوراميك فيو كله قزاز علي الجبل بس كان في شي في المكان يضايق مكتم و الاسياب مافيها مكيف و اللوبي مظلم ما ارتحت فيه ابدا

رمادا : برضو مستواه متوسط سعره معقول نظيف بس الغرف صغيره ماعجبتني للي ميزانيتهم مو كبيره ويدورو علي شي نظيف و المطعم حقهم حلو و المسبح نظيف وهاديء  يجو هنا بس بالنسبة ليا مافيه اي شي مميز يخليني ارجعله

ذا بودروم باي باراماونت : ايش احكي ايش اقول من احلى الاماكن الي نزلت فيها بحياااتيي يستحق الاشادة بيه و اني امدحه من هنا لبكره خدمة انا في حياتي كلها ما شفت زيها يشيلونك من علي الارض شيل مناسب جدا لشهر عسل او عوائل هادئ فيه فلل كبيرة و صغيره و سويتات اصغر شي فيه ستديو مافي غرف فيه كل شي الواحد يحتاجه اذا دخلتو ماراح تطلعو منه
في مطعم ايطالي و مطعم اسيوي و مطعم تركي عربي و قهوة و شيشة  و مسابح ونادي اطفال و سبا و شاطيء خاص يمتد ١٠٠٠ متر يعني كيلو و سراير كبانا فيها تلفزيون تقدرو تستاجروها و العاب بحرية على الشاطيء و فيه محل مستلزمات بحرية و مكان تشميس Deck علي البحر الي مو حابب شاطييء ورمل يعني حقيقي يكفي تدخلو الموقع تشوفو كيف كل شي موجود فيه هذا غير الخدمة و التعامل الخرافي السيئة الوحديدة الي فيه ان التنقل بقولف كار لان المكان كبير جدا جدا فلمن تطلبو قولف كار ساعات تتاخر شوية عليكم بس انا اشوفه عيب مقبول جدا جنب كل الحسنات الي بالمكان 
الفطور فيه حلو ومنوع و لذيذ يعني انا اشوفه احسن خيار للي رايح استرخاء هدوء او عائلة او شهر عسل

نيكي بيتش : الفندق ما اقدر اقول واو ولا اقدر اقول مو حلو تعاملهم ممتاز سوولنا ابقريد من دون ما نطلب و استقبلونا بتشوكلت و ابتسامات و تور في المكان الفندق يناسب زوجين شباب او قروب بنات او قروب شباب لا يصلح عوائل او شهر عسل ابدا البيتش كلب علي المسبح موسيقى و حفلات ٢٤ ساعة الاكل في الفندق ما عجبني ابدا تصميم الغرف بسيط مودرن ومريح و في شاطىء خاص بس له شتل ياخدونكم له وفي Deck علي البحر باسرة للتشميس لكن مافي رملة داخل 
الفندق لازم يودوكم الشاطي الي فيه رملة وانا مارحته ولا جربته الفندق فيه نيكي بيتش كافيه و كافيه ثاني اسمه سن سيت يقدم شيشة و اكل ومشروبات

( المطعم الايطالي في فندق The Bodrum By Paramount)

مطاعم جربتها : 
مارينا يخت كلب : الجو العام  حلو ولطيف ويستحق التجربة بس الاكل ماكان على ذوقي

بيق تشيف : رغم انه كثير ناس تحبه و تتعناه بس بالنسبة ليا اكله زي تشيليز و فرايديز و ابل بيز مافي شي مميز

ال فيتو : المطعم الايطالي في فندق باراماونت غير انه القعده رومانسية تجنن وفي عازفين يدقو موسيقى ايطالية بس الخدمة فوق الخيال و الاكل كان جدا لذيذ

زوما : من احلي اجواء زوما الي مرت عليا بس المكان مكشوف و حار شوية لكن الجو و الاكل ينسيكم كل شي اطباقي المفضلة هي السبايسي بيف - الرز بالمشروم - سوفت شل كراب سوشي

نصرت : في الصيف نصرت بنفسه يكون في بودروم الاكل نفس نصرت الي في اسطنبول لذيذ طبقي المفضل الكفتة المحشية جبن و اللوكم و برقر اللوكم

فينيكس : اكل اسيوي لذيذ

نيكي بيتش : للاسف الاكل دون المستوي المطلوب بالنسبة ليا ولا شيف مبتدأ يطبخ بهذه الطريقة ما طلبت شي صعب
سلايدر برقر و ساتيه دجاج البرقر كان عبارة عن قطع شحم و اللحمة ريحتها طالعه و العيش محروق و الساتيه ابعد ما يكون عن الساتيه الحقيقي وللاسف غير مقبول طعمه ابدا

مطعم فندق رمادا : حاولت اتذكر اسمه ما عرفت بس الاكل كان كويس بس مو انه تتعنوله لاني كنت نازلة بالفندق فاكلت فيه

مطعم الاسيوي في باراماونت : الاكل عادي مو كثير عجبني

Atilay Balik : اذا كنتو في تركوبوكو حقيقي لا تفوتوه لذيذ بشكل مو طبيعي جربت البادنجان بالزبادي و الزبادي بالشطة و الكلاماري المقلي و الشرمب و السبشل سي باس حقهم اما الحلي ما اعرف اسمه بس من الاشيا السبشل عندهم اقترحه علينا الويتر عباره عن لفايف بالقرفه و ايس كريم الذ وجبة اكلتها في بودروم الاكل فوق العادي البحري فريش فريش فريش من قللللللب رائع و الخدمة كمان بيرفكت كل الي يشتغلو بالمحل اصحابه يعني عادي يسرفس عليك وهوا لابس ساعة اوديمار ههههههه حقيقي كاشخين لاخر درجة وانا قاعده اغلب الناس الي حوليني من مشاهير الاتراك 

(Cabana Beds at The Bodrum By Paramount Hotel)

كافيهات شيشة:
دينيز في بودروم سينتر 
كاهفي في بودروم سنتر
هوكا في بالمرينا ياليكافاك
سن سيت في نيكي بيتش

You Might Also Like

0 comments