Positano Travel Guide دليل السفر إلى بوسيتانو

Friday, September 23, 2016




كالعاده كل ما اسافر مكان احب اسويلكم دليل سياحي يختصر عليكم لاني اتعب اجمع معلومات عن المكان و احسن شي ، فيه فنتيجه بحثي احب اوثقها عشان تفيد غيري و اذا تحبوا تقرأوا المواضيع الباقيه تقدروا تطلعوا عليها هنا
وهذا دليلكم السياحي لبوسيتانو!

بوسيتانو هي احدى المدن او تعتبر قرية لصغرها اللي على ساحل أمالفي الممتد على الجنوب الإيطالي . تتميز بموقع في المنتصف فاللي حابب يزور كل مدن و قرى هذا الساحل عادة يسكن فيها لأنه يقدر منها يتنقل بسهولة لقرية أمالفي , رافيلو , سورينتو , جزيرة كابري , و مدينة نابولي. بوسيتانو منطقه ساحرة فيها جمال ما تشبع العين منه حقيقي ما شبعت منها ولا من نفس المنظر اللي كل يوم أشوفه في البلكونة. تعتبر رايقة للي يدوروا عن مكان رومانسي هادئ بس بتويست إيطالي.

كيف وصلنا لبوسيتانو؟
اخدنا قطار من روما إلى نابولي و من نابولي كنا حاجزين سيارة عن طريق موقع تاكسي خاص بحيث يستنونا في محطة القطار ويودونا لفندقنا في بوسيتانو.
تكلفه التاكسي من 90 يورو و طالع علي حسب الشركة و نوع السيارة و الطريق يأخذ من ساعه الى ساعتين حسب الزحمة.
الشركة اللي حجزناها اخترنا الدفع كاش بعد المشوار حسيت اضمن يمكن ندفعلهم وما يجوا ابدا او يتأخروا بس كانوا على الموعد وكل شي بيرفكت و حجزنا نفس الشركة لمن كنا نبغي نمشي من بوسيتانو علي محطه القطار راحوا رسلولنا باص مو السيارة الي اخترناها و دفعنا فلوسها حطونا امام الامر الواقع خصوصا انه بوسيتانو ما فيها وسائل مواصلات كثير وخيارات لصغرها.
في طريقه اخري هي ان تاخدوا باص على سورينتو ومن سورينتو تاكسي علي بوسيتانو يكلف اقل لكن الطريقة هذه فيها سترس اكثر و انا ما احب الباصات.



فين سكنت؟
فندق اسمه Posiedon الفندق كان رائع بس كان خياري الوحيد لانه كل الفنادق الكويسه كانت محجوزه ومالقيت الا 4 أيام فقط في هذا الفندق ولا كان نفسي اقعد اكثر في بوسيتانو. الشي اللي لازم تعرفوه انه لا تنتظروا الكثير من فنادق بوسيتانو في العموم الأثاث فيها جدا قديم و الغرف شكلها مو حلو ومافيها أي لكجري بالمررررة لان اغلبها بيوت وفلل حولوها لفنادق واصلا طابع المنطقة كله بسيط ما فيها لكجري و تكلف. فاهم شي لازم تدوري عليه بفندقك انه اطلالته تكون ممتازة وتكون الغرفة او السويت ببلكونة , ومهم جدا موقعه بحيث يكون نقطة مرتفع بحيث تشوفي اطلالة جميله (نص وقتي هناك كان في البلكونة) وما يكون مرتفع مره بحيث يكون متعب. طبيعة بوسيتانو الجغرافية انها كأنها علي صفوح الجبل فالمدينة متقسمه فوق وتحت اذا شفتوا صورها اكثر بتفهموا عليا. وابدا لا تفكروا تسكنوا علي البحر لأنه السيارات ما توصل هناك وحتقعدوا تجروا عفشكم من اقرب محطة تاكسي للفندق وترجعوا نفس الرحلة مرة ثانية و انتوا راجعين وكونها مدينه مرتفعات ومنخفضات متعبة جدا في المشي فما بالكم اذا معاكم شنط و عفش. واصلا ما مر عليا فنادق حلوه علي البحر وانا ادور.
سارتلنا مشكله مع الفندق وقت التشك ان وصلنا 10 الصباح وقالولنا ان التشك ان 3 الظهر و الغرفه مو جاهزه فما يقدروا يدخلونا اخدوا الشنط و ودونا عند المسبح و التراس و قدمولنا درنك طفسنا نزلنا التاون اتغدينا وكان معانا ناس كتير واصلين رجعنا من الغدا الساعه 2 يعني باقي ساعه علي وقت التشك ان كل الناس دخلوهم غرفهم الا احنا مع ملاحظه ان كل النزلاء معارفهم بيسلموا عليهم لانه كل سنه بينزلوا في نفس الفندق اتكلمنا معاهم وكدا قالولنا انه كل سنه ينزلوا هنا فاللي حصل دخلوا كل الناس معدا احنا ولمن اتكلمنا معاهم و زعلنا منهم سبحان الله سارت الغرفه جاهزه في ثانيه فكان التصرف هذا مره مو بروفشنال بس عوضونا عن هذا التصرف الصراحه بمعامله حلوة.
غير كذا مطعم الفندق مره حلو و اكلهم لذيذ انصح بالEggplant Permesania مره يمي و عندهم كل جمعه لايف ميوزك علي العشاء في التراس مره الجو يجنن كان يومتها و رومانسي و رايق. ونسيت اذكر انه فطورهم حلو كمان مقارنه بفنادق اوروبا.

فطور الفندق


اقتراحات فنادق كنت اتمني انزل فيها بس ما لقيت امكانيه؟
Le Sirenuse
Villa TreVille
Lancora
تراس الفندق الي سكنت فيه كبير وفيه خصوصيه مرررره تقدري تتشمسي هنا 
ملاحظات مهمه
- لازم تعرفي انك حتمشي مرتفعات ومنخفضات فاذا صحتك ما تسمح بيكون الموضوع صعب
- الممنطقه هادئه ومافيها لا شوبنق ولا صخب كل اللي فيها بحر و اكل حلو ومناظر جميله و استرخاء
- الصرفية هناك مره مو زي روما او ميلان اغلى بكثييييير يعني اقل وجبه ل2 في مطعم حتكلفكم 70-90 يورو
- ما تصلح للسواقة لأنه الطريق يعدي سيارة واحدة وما في مواقف فمرة صعب
- ما فيها حياة بالليل بس مطاعم قليلة الي تفتح بالليل ومافي أماكن سهرات الا مكان واحد فقط اسمه Music on the rock
- ما فيها مولات ولا ملاهي ولا ووتر بارك ولا شي


المطاعم

La Sponda : 
مطعم ينفع لعشاء رومانسي بالليل يولعوا 400 شمعة وما يشغلوا لمبات الجو فيه ساحر الأكل إيطالي فاين دايننق ماخد ميشلين ستار ولاااازم تحجزوا قبلها بشهور موجود بفندق Le sirenuse

Oyster Bar: 
مكان مشروبات بس بالمساء في فندق لا سيرنيس شفت فيه كريس جينر و كورتني كرداشيان.

Da Adolfo : 
مطعم سمك قديم ومعروف عندهم مرة موجود بمنطقه ثانيه عندهم بوت عليه علم سمك حمراء تلاقوه عند الشاطيْ ياخدكم للمطعم يفتح للغداْ بس.

 Zass Restaurant in II San Pietro Luxury Resort :
اكبر مقلب في حياتي رحته علي أساس فاين دايننق و عشا رومانسي الصراحه مطعم الفندق كان احلى بكثير والاكل الله يكرم النعمة مو لذيذ ابدا مع انه اخد ميشلين ستار بس ما اعرف علي ايش المنظر فيه مظلم بالليل ماتشوفي شي فما يستحق العنوة صراحة خصوصا انه مشوار نص ساعه بالسيارة.


Music On The Rocks :
المكان الوحيد اللي فيه سهره هناك بس ما رحته.

Chez Black : 
من المطاعم الي مسيطرة على الشاطئ عشان موقعه الاستراتيجي بس الاكل حلو و الخدمة أممممم عادية القعدة فيه حلوة تشوفوا الرايح و الجاي.

Casa E Bottega :
مطعم صغير بين محلات التاون يقدم اكل صحي و سموذيز الاكل فرش جدااا و صحي جداااا و الجو العام فيه حلو لانه مكيف و الديكور كتكوت تغيير شوية عن اجواْ بوسيتانو ممكن تجوا تاكلو سناك او فطور او غدا بس عشا مرة لا

Max : ثاني اكبر مقلب في التاريخ كان علي طريقنا واحنا مره جيعانين فقلنا يلا كان جدا جدا جدا سيء الصراحه اكل وسرفس و سعر 





Rada :
اذا طفشتوا وزهقتوا من الاكل الايطالي الساحلي لانه تقريبا كللل المطاعم نفس المنيو تعالوا هذا المطعم لانه يقدم سوشي 

Positano Cafe : 
هذا كان قدام فندقنا ومره بالليل كنا تعبانين مره فقررنا ناكل فيه ما نبغى نبعد كثير المهم كان ثاني اسوا شي بعد ماكس مره مو نظيف المكان الكاسات كان فيها ريحه غريبه لدرجه ما تحملت طلبت كاسات البلاستيك الاستعمال الواحد اشرب فيها كميات الاكل كانت كبيره بس الطعم كان افرج جدا عادي عادي يعني ماتقدري تقولي لذيذ او حلو لا عادي اللي هوا ينبلع بس و حصل كمان انه بعد ما حاسبنا كان فيه باقي قعدنا نستناه يمكن ربع ساعه وكنت اطالع الويتر اشوفه واقف فاضي وحط الفلوس وخلاص يعني ما يبغى يرجع الباقي. الحركه كانت مره رخيصه ومو حلوه. الغريب انه تقييمه في فور سكوير كان جيد تقريبا ٨.٦ فمره غريب.

مطاعم و لاونج Villa Treville  :
ماكفاني وقت اني اروحها بس شكلها مررررره حلوه في المطعم الرئيسي حقيهم و كلب لاونج و صالون بيانكا.

Franco's Bar :
برضوا تابع لفندق Le Sirenuse بالليل مره جوه حلو يشغلوا اغاني و هوا علي اوبن ايريا على منظر جميل جدا مكانه بين فندق لا سيرنيس و فندق لانكورا ما يقدموا الا مشروبات.


Next 2 :
اكلهم حلو حق غدا 

Ristorante Da Costantino :
من المطاعم الي مدحوها ليا كثير وما لحقت اروحوا.

Saraceno D'oro : 
من المطاعم الي انمدحت ليا ايضا وما رحته.


ايش ممكن اسوي وانا في بوسيتانو؟
- زياره لكابري بالفيري يكلف روحه ورجعه للشخصين ٧٠ يورو
- زياره لسورينتو بالباص او البوت او سياره خاصه
- زياره لرافيلو بالبوت لامالفي ثم باص او سياره توديك لرافيلو
- زياره لامالفي بالبوت
- تاخدي برايفت يخت او بوت يدور فيكم على ساحل امالفي
- ممكن تزوري نابولي بالسياره مده ساعه او ساعتين حسب الزحمه و تكلف ٩٠-١٠٠ يورو للروحه فقط
- في على الشاطئ اماكن العاب بحريه زي البنانا بوت و غيره
- في شي اسمه Path of God يقال انه من اجمل الرحلات الي ممكن يسويها الانسان في حياته مشي طلوع متعب جدا جدا لكن يقال ايضا ان المنظر و الطبيعه خلال المشي رائعه و ساحره تستاهل التعب تصل لمنطقه عاليه فيها منظر بانورامي لساحل امالفي الصراحه ما عندي فكره فين نقطه الانطلاق للمشي لاني ماكان عندي قدره جسديه اني اطلع الطريق هذا فما رحت لكن تقدروا تبحثوا عن الموضوع بس اكتبوا باث اوف قاد
- تتشمسي على البحر او في تراس فندقك او تروحي بيتش كلب حق فنادق تانيه بس عموما البيتش كلب في بوسيتانو تنعد ع الاصابع وماهي زي البيتش كلبز الي في كل مكان لانو اصلا مافي بيتش تكون صخور على البحر يحطوا عليها كراسي التشميس وخلاص هوا كذا.

محلات ملابس لينين ممتده على التاون كثيره مره
مشهوره بايش بوسيتانو؟
- صناعه الصنادل custom made والمحلات منتشره بكل التاون تدخلو تختارو تصميم و يصنعولكم المقاس على قدكم بالملل في نفس الوقت.
- صناعه السيراميك وعندهم تشكيله صحون و اواني و تحف سيراميك تجنن بس للاسف ثقيله مره وانا كنت بتنقل فما قدرت اخد شي منهم.
- صناعه الملابس اللينن حتلاقوا المحلات متنشره بكل مكان تجنن قليله عليها كلها لينن تصاميم مره تجنن كلها كلين كتس clean cuts اذا ودكم لا تشيلوا ملابس كثير معاكم واشتروا من هناك والبسوهم.
- الليمون من منتجاتهم المهمه طول ما انتوا ماشيين ريحه ليمون ومنتجات كثيره بالليمون تباع عندهم مميزه وريحتها قويه عندهم تروللي تبيع سلش ليمون لمن انتو نازلين من التاون ع البحر تقابلكم حقيقي لا يفوتكم مره منعش مع حر الصيف و فرشششش ومافي سكر تحسوه سلش صحي و في المحلات تلاقوا عطور و حلويات و صابون وغيرها من مشتقات الليمون.
- الاكل البحري اساس مطاعهم لانهم على ساحل فالمنيو نفسه متكرر في كل المطاعم اغلب الباستا بسي فود و كثير اسماك و كل شي من البحر في المنيو.
- اشهر و الذ طبق عندهم الموزريلا على ورقه شجر الليمون من الأكلات المحليه الي لازم تجربوها وابدا مي مالحه لا تخافوا مو .زي الموزريلا حقتنا ابدا.
- بالنسبه لهم هما مشهوره بالواين المحلي بس مالنا فيه.
- طبق تاني كمان مشهور اللي هوا Eggplant permesania عباره عن بادنجان مقلي مع صوص طماطم و برميزان مره لذيذ.

محل فواكه قدام الفندق (فواكهم وخضارهم لذيذه بشكل مو طبيعي)


اذا عندكم اي اساله او استفسارات لا تتردوا انكم تسألوا 
اتمني تكونوا استمتعوا معايا في الرحله
ولاتنسوا تضيفوني على سناب شات Ghadeers_alsh



You Might Also Like

4 comments

  1. hello,ciao...nice photos!...super nice photos!...but what a pity You didnt share also some photos about Your outfits...maybe in a new post?
    Thanks,Mashallah

    ReplyDelete
  2. Thaaanks a lot for this great information. Love your post :)

    ReplyDelete
  3. Such a useful information..Thanks for sharing this post

    ReplyDelete