My Experience with False Nails ; HudaBeauty, Impress, and Clairs تجربتي مع الاظافر التركيب من هدى بيوتي , امبريس , و كليرز

Sunday, May 15, 2016


حبيت اكتب هذا الموضوع عشان حسيت في نقص كثير
ومؤخرا انا سايرة مرة مشغولة وما اقدر اعمل مناكير او ساعات كتير اظافيري تنكسر و يكون عندي شي مهم 
فاضطر اني اركب اظافر على السريع 
قرات كثير في النت عن انواع اظافر ما تحتاج شغل كثير و جربتهم الي هما هدى بيوتي و امبريس و كليرز 
فقررت اكتبلكم ريفيو عنهم , رأيي فيهم , ومدى ثباتهم 


Huda Beauty

جربت اظافر هدى بيوتي بالسفر يعني كانت تحت تجربة قوية 
:و كان انطباعي عنها الآتي
- اغلب الاحجام كانت مناسبة لأظافيري لكن في كم ظفر اضطريت ابردهم عشان يكونوا مقاسي
- الغرا الملحق معاها كانه سوبر قلو اعتقد انه سوبر قلو بتعليب مختلف لانه يحوس الدنيا و اذا جا ع الجلد يكون طبقة ما تروح الا لو حكيتها بمبرد بعد ما تنشف
- تحت استخدام مكثثثف جدا صمدت اسبوعين كاملة طاح خلالهم كم ظفر لكن اخدت غيره و حطيت غرا و ركبته من جديد
- لاحظت انهم مو طوال كثير طولهم وسط حلو 
- يجي معاها ملحق الغرا و مبرد
- موجودة بسيفورا ب 75 ريال او 75 درهم

اوفر اول : كويسة , اشكالها حلوين , اذا ركبتيهم صح تبان طبيعية , سعرها غالي , ما راح اشتريها مرة ثانية لانه في بدائل ارخص

 Impress Press On Manicure

خلاصة تجربتي عنها :
- الحلو غراها منها و فيها , في ستكر من الخلف فيها ينشال و يتحط على الظفر على طول 
- ملحق معاها بري باد زي المنديل يمسح بيه الظفر قبل ما تحطي الظفر وكمان معاها مبرد زي الورقة مرة نحيف عكس مبرد هدى بيوتي سميك 
- متوفرة باطوال مختلفة طويل ووسط و قصير. انا جربت القصير منها 
- الوانها و اشكالها جدا جدا جدا جميلة و متنوعة لكل الأذواق
- ثباتها ممتاز جدا الا اذا انتي مررره عفشة ممكن يطيح معاك ظفر ولا اثنين فاذا خارجة برا البيت خذي صمغ احتياط او شيلي العلبة احتياط تحطين ظفر ثاني بداله
- تعليبها ظريف و صغير تقدري تاخديها معك اي مكان اذا كنتي على عجلة
- تتوفر في بوتس ب65 ريال مع انها في دبي في كل الصيدليات وا لسوبرماركتات ب 30 درهم و اون لاين ارخص و ارخص كمان فافضل اشتريهم من دبي او اون لاين بس ما يمنع اذا جاتك مناسبة فجائية تمري بوتس تاخدينها
- انصح فيها و حشتري منها زيادة اعتبرها المفضلة عندي حاليا

Claire's Pre-Glued Nails

خلاصة تجربتي عنها :

- غراها منها و فيه بس مو زي امبريس فيها لصق يتفك . لا ! هذه على طول تفكي العلبة و بدون بلاستيك ولا لصق يتفك على طول تحطيها على ظفرك 
- ما معاها اي ملحقات
- افشل من الفشل نفسه دقيقه واحده ما تقعد تطيح علي طووووول
- موجودة بمحلات كليرز ب 35 ريال
- ما انصح فيها ابدااااااا


وهذه كانت تجربتي مع الثلاثة انواع
اذا في انواع اخرى تنصحون فيها قولولي 

You Might Also Like

8 comments

  1. انا اشتريت الاظافر الي تجي مجموعة بعلبة كبيرة يستخدمونها بالصالونات تجي نحيفة و طبيعية و انتي تختاري طولها كل ما احط منها يحسبونها اظافيري الطبيعية و احلى شئ فيها مقاسات في نفس العلبة يعني تناسب الكل حتى نفس شكل الظفر انتي تختارينه مربع او دائري

    ReplyDelete
  2. انا كانت لي تجربه فاشله معاها شكلها كان حلو حرام وماتفكت بس عذبتني وقت الفك
    احتجت انقع يدي بمويه دافيه ومع شد وجذب ودفاشه الدنيا حتي انفكت
    بسأالك عن Impress Press On Manicure
    كيف تتفك بسهوله ولا كيف ؟

    ReplyDelete
    Replies
    1. امبرس تنفك بسرعه و سهوله مويه حاره وخلاص تفك على طول

      Delete
  3. حبيييت البوست😍 غريب انو مافي توفر كبير لأظافر مريحه لبراندز كويسه.. كنت محتاجه ريڤيو عن الاظافر وجا بوقته😍 امبرس احبهااا بس ماكنت اعرف انو ممكن اطلبها اون لاين.. تعرفي ويب سايت معين يبيعها؟

    ReplyDelete
  4. والله افدتيني في هالتدوينه جدا ..خصوصا اني احتاج اظافر تركيب لوقت الزنقه مره ..شكلي بجرب Impress Press

    ReplyDelete
  5. مشكورة مرره ، لي فترة ابحث عن أنواع كويسه ، بس حابه اعرف إذا استخدمت الاظافر استخدام يوم وفكيتها ماعاد اقدر استخدمها ؟

    ReplyDelete