Travel : Cairo top spots, boutiques, and must visit places القاهرة الجديدة , مطاعم , بوتيكات

Wednesday, March 09, 2016





رحت رحلة قصيرة للقاهرة و اغلبكم كان متابع معايا في سناب شات تفاصيل الرحلة

وكنتوا مبهورين بالأماكن الي رحتها و كثير منكم قالي هذه مو القاهرة الي نعرفها او الي زرناها

و جاتني طلبات كثير اني اكتب الأماكن الي رحتها و البوتيكات و الحاجات الي انصح فيها

لكن قبل اي شي خلوني اقلكم انا رحت القاهرة عشرات المرات فالأماكن التاريخية و المتحاف و الحاجات هذه ماراح تلاقوها هنا

لاني زرتها وحافظتها من و انا طفلة صغيرة فراح ادلكم على الاماكن الحلوة الترندي من مطاعم , اسواق , كافيهات , بوتيكات

راح اقسم الموضوع لكذا قسم و انشاء الله تستفيدوا منه


اسمعوا اغنية القاهرة حقت عمرو دياب  الجديدة و ادخلوا جو مع البوست 


اول شي مكان الإقامة 

كان مهم عندي اني اسكن بمكان قريب من كل شي وخصوصا الأماكن الي حاطتها باللست اني بروحها اخترت اني اسكن في الزمالك لانها من ارقى مناطق القاهرة فيها كل شي احبه و حابه ازوره

بالنسبة ليا اخترت فندق كونراد الزمالك 


مميزات الفندق : 
1- نظيف
2- اسعار ممتازة
3- مطل على النيل
4- الخدمة رائعة 

سيئات الفندق :
1- قديم من حيث الاثاث و التقنيات
2- الفطور اسوا فطور فندق جربته في حياتي 
3- اول غرفة ادونا هيا كانت ريحتها سيئة جدا ريحة مادة كيميائية تجي من المكيف لانه لمن نقفل التكييف مافي ريحة بس عموما عوضونا بغرفة احسن و اكبر في الطابق الexecutive وكانوا جدا متعاونين و زي ما ذكرت في المميزات ان التعامل راااائع و الخدمة ممتازة

نظرة عامة : مو احسن فندق ولا اسوا فندق و اعتقد المرة الجاية راح اجرب مكان ثاني ( فيرمونت او ماريوت ) 




المواصلات 

ما يخفى عليكم زي اي بلد وزي اي سائق تاكسي متواضع يحب يكسب من السياح و ياخد مبالغ كبيرة مش الكل بس الاغلبية كذا فقررت اتجنب هذا الاستغلال و استعملت تطبيق UBER الي كان جدا مريح و رخيص 
من ناحية ان السيارات نظيفة ومكيفة , الاسعار زهيدة جدا جدا جدا 
مرة من المرات حبيت اقارن احد المشاوير فرحت بتاكسي بالعداد وكان الحساب 90 جنيه
وفي الرجعة استخدمت اوبر وكان الحساب 40 جنيه فقط
العيب الوحيد في استعمال اوبر في مصر ان اللوكيشن ما يزبط بالملل يعني لازم اتصل على السائق و اشرحله انا فين واقفة بالتحديد
لذلك انك تطلعي شريحة تلفون مصرية افضل او الحل الي انا استعملته اني استعملت شريحة سعودية شحن عشان اقنن استعمالي وما انصدم بفاتورة عالية جدا 
فالرصيد يروح قدام عيني و اعرف انا ايش استعملت لان ساعات للاسف شركات الاتصالات عندنا احس تبالغ و تنزلك مبالغ فواتير تكوني شاكة فيها
فعشان اريح نفسي و ضميري استعملت جوال كرت شحن مبين قدامي كل اتصال كم صرف 




الإفطار

1- Left Bank من احلى اماكن الفطور الي مرت عليا مكان مرة ترندي يطل على النيل لكن الIndoor فيه احلى بكثير
الأكل رائع الatmosphere جميلة جدا ( شارع محمد ابو الفدا قريب السفارة السعودية على النيل )

2- TBS اختصار The Bakery Shop اذا تبغوا فطور on the go تشترو و تاكلوا وانتوا واقفين ولا انتوا ماشيين مرة حبيت هذا المخبز الكروسونز مرة لذيذة و فرش وعندهم خدمة توصيل ممكن تطلبوا للاوتيل يوصلكم في اقل من ساعة ( الزمالك قريب من موري سوشي و قريب من شارع اسماعيل محمد )

3- حدائق فندق الماريوت : المكان جدا رائع ومريح للنفسية طبعا اوت دور هوا مفتوح ينفع لغير فطور بس فضلته للفطور ما اعرف ليش ( شارع 26 يولو  الزمالك )


المطاعم و الكافيهات : 

1- أبو السيد : اشهر من نار على علم اهم مطعم اكل مصري Traditional ما احكيلكم على البامية و الملوخية و الأكلات التقليدية المصرية بس نصيحة لا تاكلوا طول اليوم اذا حتاكلوا هنا لان الاكل دسم وممكن يكبس عليكم يومين بس حقيقي اذا تحبوا الاكل المصري مرة راح يعجبكم كانه طبخ بيت ( الزمالك )

2- Mori Sushi اذا تبغوا تدوقوا اطعم سوشي ممكن تدوقوه هوا هنا حقيقي سوشي مرة فرش ومرة طعم وخدمة فوق الخيااااااال المكان صغير و محندق يعني for a quick meal مو انه تجلسوا تطولوا وديكور حلوا و كدا لا بس اذا تبغوا اكل حلو ع السريع حقيقي انصح اي احد فيه من الذ السوشيز الي جربتها بحياتي انصح بطبق السبايسي ليمون فرايد و البنك بانثر مرة لذيذين بطريقة مو طبيعية بالنسبة للخدمة في طبق من الابتايزر كان مو قد المستوى فسألنا الويتر بعد ما خلصنا عن الاكل و قلنالوا ماعجبنا الابتايزر
مرة حبيت انو سال ايش الي ما عجبنا بالزبط عشان يعدله في المرات الجاية و حقيقي باين انو جدا مهتم وقعد يسال بالتفصيل عشان يعرف يحسن الطبق او طريقة الطبخ غير كدا اصر انو ينزل واحد تاني محسن للي طلبناه و المفاجاة انو لمن جات الفاتورة كان شايل قيمة هذا الطبق الشي الي خلاني احس انو فعلا مهتمين بالمكان و بجودة الأكل و انه مافي كستمر يخرج زعلان so thumbs up ( الزمالك وفي فروع تانية )

3- أهواك : طبعا يختلف تماما عن اهواك جدة ومو تبع بعض ابدا , اهواك القاهرة مقهى رايق جدا اذا تبغي تروقي في مكان هاديء بديكور جميل و اغاني اجمل هذا هوا المكان اعتبره hidden treasure بعيد عن الزحمة و الازعاج ( شارع 26 يولو الزمالك )

4- كافيه Beymen في فندق فور سيزن في نايل بلازا نفس فكرة اهواك كافيه رايق و هادي وحلو

5- سكويا هذا المكان من كثر ما عجبني رحته مرتين وانا من الناس الي مستحيل تكرر مكان في سفرة احب اني اكتشف مكان جديد بس سكويا ما قدرت حسيته مكاني ومرة انا الي راح اسطنبول هوا كثير يشبه هوكا . ديكور حلو اغاني حلو اكل حلو كل شي حلو كدا شوية hipster كل شي فطيع في المكان و اعتبره Must visit while in cairo حبيته بالليل اكثر شي و لازم تتصلوا تحجزوا و تسالوا عن المنمم تشارج كم ( شارع محمد ابو الفدا جمب السفارة السعودية في الزمالك على النيل )

6- اركان بلازا .  اركان في منطقة مرة بعيدة قريب من شارع الشيخ زايد فلمن تروحوا اتاكدوا انكم تروحوا مول العرب في نفس اليوم لانهم بنفس المنطقة و بعيدة جدا عن وسط القاهرة تقريبا ساعة من الزمالك المنطقة هذه فيها كافيهات ومطاعم مرة حلوة ورايقة تفكرني بمارينا دبي جربت فيها كافيه سوري نسيت اسمه بس كان مرة حلو و الخدمة ممتازة جدا المنطقة تستحق الزيارة لكن برضوا بالليل او المغرب كدا عني رحتها كشاي و quick bite ( منطقة الشيخ زايد )

7-  Burger Factory المكان مرة صغير بس لطيف احب المطاعم الي لها concept وفيها شي جديد المميز في برقر فاكتوري انه عنده برقرز نكهات مرة غريبة وجديدة جربت السوشي برقر لمحبين السوشي مره حيعجبكم لانه فيه واسابي و المنيو متنوع في حاجات كثير غريبة ( شارع 26 يولو الزمالك )

8- Mince Burger  سمعت عنه مرة كثير بس ما سنحتلي الفرصة اني اكل فيه بس جربوه سمعت انو احلى من برقر فاكتوري كمان و على فكرة مقابل له في بوتيكين ملابس حلوة 69 و the dressing room ( شارع اسماعيل محمد في الزمالك )

9- مقهى نجيب محفوظ عند الحسين و خان الخليلي .. امم مرة ما حبيته حسيته overrated وفي منمم تشارج عالية جدا على اني بس جاية اشرب شاي ( الحسين )

10- زوبا هو مكان كشري و كم اكلة شعبية تتعد ع الاصابع بس المكان ترندي ومو شعبي ابدا الكشري حقه مرة لزيز ومو ثقيل مرة يكبس ع المعدة , جربت كمان البطاطس المحمرة حلوة مرة . جوا المحل طاولة واحدة تسع يمكن 10 اشخاص وكل احد يجلس مع اي احد فهمتوا عليا ؟ يعني انا وزوجي جلسنا قبال بعض ولاصق فينا ناس تانيين عادي يعني انا ما امانع بس حبيت افهمكم فكرة المكان عشان ممكن في ناس تتضايق وما تحب و عشان اذا رحتوا قروب كبير ممكن تنتظروا عشان تستنوا كتير ناس يقوموا وتجلسوا لانوا زي ما قلت ما يسع الا 10 اشخاص على ما افتكر ( الزمالك شارع 26 يولو و في فروع تانية )

11- بلكونة كافيه ديكوره مرة حلو و الاغاني مرة حلو بس للاسف كان في واحدة تدرس بنتها باعلى صوت خربت كل المود هههههه بس يستحق الزيارة اذا رايحين ناحية المهندسين و شارع جامعة الدول 

12- Ney Lounge كل مرة اروحوا يكون فاضي جدا ما اعرف ليه فاضي لدرجة الطفش بس لمن صحباتي يصوروا سناب في زحمة وناس و اغاني حلوة بس يمكن رحت الوقت الغلط ؟ ( المهندسين )

13- كراكاس : كافيه برضوا رحت لشاي و درنكس و كدا بس حلو القعدة حلو الديكور لطيف ( المهندسين )

اركان بلازا
أبو السيد
سكويا
زوبا
الأسواق و المولات :

1- Nile towers : حسيت اني ضيعت وقت حقيقي ما حبيته وما عندي اي شي اكتبه عنه اللهم دخلت سينما وماهي فظيعة كمان

2- مول العرب : مول جديد حلو تزوروه مع اركان بلازا زي ما ذكرت فوق لانهم بنفس المنطقة ومرة بعيد عن وسط القاهرة ساعة تقريبا ماهو احلى مول من ناحية المحلات اللي فيه لكن يستحق الزيارة للكافيهات اللي برة حقيقي مررررررة حلو في نافورة و مطاعم كثير و كافيها نفس جو دبي مول على مصغر ( منقطة الشيخ زايد )

3- Cairo Festival City Mall حبيته كمان شي مرة جديد على القاهرة نفس العرب مول هذا في منطقة اسمها التجمع الخامس برضوا مرة بعييييييدة تحتاج من وسط القاهرة 40 دقيقة تقريبا نفس فكرة مجمع العرب كمان في قعدات ومطاعم بس الي في مجمع العرب احلى الصراحة في منطقة هناك يقولوا اسمها داون تاون ؟ ما شفتها الصراحة نسيتها اسالو عنها ( التجمع الخامس )

4- سيتي ستارز ما رحته هذه المرة بس يعني معروف في محلات كتيرة و مطاعم وسينما كويسة 

5- خان الخليلي معروف طبعا منطقة شعبية و الحاجات الشعبية اذا ما قد زرتوا روحوا انا عني رحته كثير فما احتجت ازوره هذه المرة ( الحسين )

6- شارع المعز لدين الله قريب من خان الخليلي كله في منقطة القاهرة الاسلامية الي هيا عند الحسين كله محلات انتيكات مرة حلوة و في مطعم هناك يقولوا مرة حلو بس ما حصلت فرصة اني اكل فيه اسمه Le Riad ( الحسين )


مول العرب

مول العرب

شارع المعز لدين الله



البوتيكات :

هنا حتكلم شوية كتير اول حاجة انا اكثر شي احب ازوره في اي بلد البوتيكات ما احب المولات لان المولات كلها ماركات عالمية معروفة و البضاعة واحدة في كل مكان سواء اتاخرت و نزلت قبل بمكان و مكان لا بالنهاية نفس المحلات ونفس البضاعة ومافي شي مميز الا لو ماركات luxury الي بعض القطع ما تنزل عندنا وتنزل برا 
فدايما ابحث عن البوتيكات المحلية الي فيها قطع مميزة وغريبة من حول العالم و فيها مصممين البلد المحليين 
في القاهرة طبعا لقيت بوتيكات جمييييييييييييييييييلة جدا ما اتوقعت اني الاقاها بالقاهرة

Villa Babushka فيلا بابوشكا : من اجمل البوتيكات الي دخلتها بحياتي حقيقي بوتيك مبهر كل قطعة اجمل من الثاني من Upscale designers من كل انحاء العالم طبعا عشان اوصل للبوتيك تهت لانهم وسط حي ومو حاطين لوحة كبيرة سالتهم ليش قالوا لانهم حابين يكونو اكسكلوسف ومو اي احد ماشي بالشارع يدخل و يشتري وتنتشر القطع و هذا الكونسبت مرة حبييييييته 
طبعا اشياء عجيبة غريبة في المحل من لوح فنية عطور ملابس اكسسوارات يعني مرة زعلت اني رحتهم قبل المطار بكم ساعة لاني كنت ابغى اقيس و اشتري نص المحل 

69 : هذا البوتيك في ماركات شوي اقل من فيلا بابوشكا من ناحية السعر لانه اغلبه كاجوال حبيته مرة في قطع كثير مميزة ويستحق الزيارة اخدت منهم كفر جوال 

The dressing room : للاسف لمن رحت كان في اصلاحات في البوتيك فما قدرت اشوف حاجة بس قلت اكتبلكم هوا يمكن لمن تروحوا تشوفوه مفتوح و تلاقوا حاجات حلوة بس عموما هوا جمب 69 الاتنين لازقين في بعض

The Doll House : برضوا ما سنحتلي الفرصة ازوره

ABnG : اكثر البوتيك قطع ديكور و انتيكات حقيقي جميييييييييييييييييييييييل يستحق الزيارة فعلا عندهم فرع في واحد من المولات ناسية ايت لكن الفرع الي دخلته كان في منطقة فيها كل هذه البوتيكات راح اذكرلكم اسمها تحت كمان


WakiShop : امممم مرة مو ستايلي ابدا ستايل فسفوريات و اقمشة تلمع وسلاسل و ستدز يعني مرة مو انا فما حبيته

طيب فين دي البوتيكات كلها ؟ كللللها في الزمالك في شارع اسماعيل محمد او حول هذا الشارع الي هوا عند كلية فنون الجميلة
بس عشان تعرفوا مكانهم بالتحديد وانتو ماشيين برجولكم في المنطقة افتحوا فور سكوير اكتبوا اسم المكان و افتحوا الخريطة وشوفو انتو فين عنوا الين توصلو ليه . ساعات ما يكون المكان مرة باين او يكون في فيلا و اللوحة مرة صغيرة فطالعوا حولينكم ودققوا 
او اتصلوا على البوتيك وخدوا منهم directions 



Joud Home : لي ذكرت جود هوم بعدهم كلهم ؟ لانه مو في نفس المنطقة . جود هوم موجود في شارع لبنان وسوق سيتي ستارز عندهم حاجات البيت الترندي الي فيها صور ممثلين قدام شفتوا ستايلهم انتوا لمن صورتهم في سناب شات و كمان تقدروا تشيكوا على الفيس بوك حقهم و انستقرام فيه صور كثيرة ( المهندسين شارع لبنان )

مكتبة ديوان : مكتبة فيها كتب و بعض اشياء جود هوم ودفاترة وكدا حطيتها مع البوتيكات ما اعرف لي بس مالها تصنيف و كمان في كوفي شوب صغير تقدروا تجلسوا تشربوا شي وتقرأوا  ( شارع 26 يوليو الزمالك )

فيرجين ميقا ستور : عندهم مرررررة حلو حبيته كثير لانه في منتجات مصرية لوكال عليها صور فنانين عليها عبارات حلوة مرة فيستحق الزيارة اصلا انا اي فرجن في اي مكان في العالم لازم ادخل ما اقدر اقاوم 



اماكن ما زرتها لضيق الوقت و ينصح فيها انتوا عاد ابحثوا عنها و كونوا رايكم عنها وزورها عني و قولولي كيف 
1- Birdcage
2- The lemon tree & Co
3- زينب خاتون
4- قبة الغوري
5- ميدان طلعت حرب
6- Windsor hotel
7- Peking
8- ساقية الصاوي
9- Nile City Sky Pool
10- Cairo Jazz Club
11- دون كارلوس
12- مطاعم فندق الفورسينز في قاردن سيتي
13- كشري ابو طارق
14- مكتبة صوفي


طيب كيف اقسم نفسي ؟ 
قسمي خرجاتك على حسب المنطقة و المطاعم
يعني احنا كنا تقريبا كل يوم في الزمالك وكنا ساكنين هناك و شايفين كيف اغلب الاماكن الحلوة في الزمالك 
فايام كنا كلها نقضيها في الزمالك
لمن حبينا نروح منطقة الشيخ زايد رحنا مول العرب و اركان مع بعض 
حواولوا تجمعوا الاماكن مع بعض الي في نفس المنطقة و سهلت عليكم الموضوع كتبت بعد كل مكان المنطقة الي هوا فيه عشان لمن ترتبوا جدولكم اليومي تعرفوا فين تروحوا
مثلا المهندسين خليتها اخر ايام لمن رحت اشتري هدايا بسبوسة و فصفص رحت الكافيهات الي هناك و  رحت جود هوم الي هناك على فكرة في شوارع تسوق هناك بس ماهي من اهتماماتي البراندز العادية المعروفة زي ما ذكرتلكم من قبل انه نفس البضاعة في كل بلد فنصيحتي لا تضيعوا وقتكم في شي موجود بكل مكان او ينطلب اون لاين 

طيب نجي للثلاث اسألة  الي شاغلتكم كلكم و اتكررت كثير

هل البلد أمان ؟ 
جدا امان و شرطة السياحة في كل مكان , كل المولات فيها تفتيش شنط بالاجهزة و كل الفنادق كمان

هل في شحاتين و حرامية ؟
الظاهرة هذه تقريبا انتهت يمكن فيه شوية عند الحسين لكن كل الاماكن الي رحتها وزرتها مافي واحد شحات ولا واحد حرامي حتى البلد حقيقي اتغيرت للاحسن و جدا امنة و جميلة ما تخافوا ولا تشيلوا هم ابداااااا

هل يطلبوا بخشيش كتير ؟
محد يطلب انتي بكيفك تعطي لكن يستاهلوا على الخدمة الاكثر من ممتازة في كل مكان فما تبغي تكسفي احد خدمك خدمة سوبر
أما المطار بالذات مضطرة تدفعي عشان ما يقعدولك كتير في التفتيش و حصل معانا كم موقف كدا واحد موظف تفتيش الشنط شاف جهاز شفط الحليب في الشنطة الكبيرة الي راح تنشحن مع انو جهاز معروف ودايما اسافر فيه و في النهاية هوا في شنطة شحن بس سوا فلم كلوا عشان ياخد مبلغ وما عدانا الين دفعناه للاسف ووحصلت مع زوجي كمان واحنا داخلين المطار الموظف الي يشيك ع الجوازات سوا فليم برضوا وفتح الجواز وقال "حط يا باشا " يعني حط فلوس جوا الجواز عشان ما ابهدلك
فالمكان الوحيد الي حقيقي تحتاجوا تدفعوا عشان لا تتعبوا راسكم و تخلصوا بدري المطار فخلوا معاكم فكات

هدايا اخدها معايا؟
غالبا بسبوسة من محلين يا تسبس في شارع جامعة الدول او قويدر
والفصفص و المكسرات من العرابي او ابو عوف

وبس اذا عندكم اي اسئلة في الكومنتس و اذا حابين اغطي كل مكان اسافرة كمان حطوا بالكومنت


You Might Also Like

4 comments

  1. تقرير اكثر رائع ما سبتيلي مجال اسال اي سؤال
    كفيتي ووفيتي شكرا لك

    ReplyDelete
  2. فكرة البوتيكات اللي بتزوريها جدا مللهمه كنت اشوف بوتيكات للانتيكات وهيا اكتر شي يلفتني بس واحنا ماشيين بالسيارة وما فكرت اني ادخلها بس بعد تصوير السناب حمستيني مشكلة البوتيكات دي انها مهي واضحةيعني يبغالك سواق بالو طويل يلف معاك ، جربت سواق من اوبر يلففني ساعتين وكانت تجربة رهيبة والسواق كان فاااهم في الطرق ، وفي سفرتك القادمة لا تنسي تزوري الداون تاون في شارع ٩٠ شي مرتب وراقي ... وشكرا ع البوست الملهم

    ReplyDelete
  3. متحمسة مرررة اروح مصر و ازور كل الاماكن الي قلتي عليها
    يديك العافية

    ReplyDelete
  4. تقرير اكثر من رائع

    ReplyDelete