Busy Mamas (Collaboration)

Friday, February 19, 2016


كثير مننا مع متطلبات الحياة نسير مرة مشغولين ودنا يكون شكلنا مرتب على طول , ودنا نكون لابسين و متأنقين 24 ساعة لكن الحقيقة و الواقع ما تسمحلنا بكدا في مننا الأم او الي تدرس او الي تشتغل او الي تدرس و تشتغل و تربي و الموضوع هذا بيكون كثير صعب عليها.

اتعاونت مع بلوق أمل ترتر ثنكس و بلوق بيان اننا نعطيكم شوية نصائح كل واحد في مجالها في كيف انكم تجهزوا بسرعة و تكونوا دايما مرتبين و لابسين و شكلكم مرتب باسهل الطرق 

امل حتتكلم عن المكياج  تقدروا تشوفوا موضوعها هنا 

و بيان حتتكلم عن الفطور السريع الصحي تقدرو تشوفوا الفيديو حقها هنا 

وانا راح اتكلم عن مفتاح انك تكوني ستايلش باسرع وقت



1- المجوهرات اليومية  اسهل شي انو يكون عندك اكسسوار او مجوهرات معينة يومية ما تفسخيها كم سلسال بسيط على رقبتك حلق يومي , دبلتك , خواتم بسيطة ما تضايق و اساور ما تفسخيها من النوع الي تنامي فيها و تتروشي فيها ما تخرب فيفضل تكون ذهب او مطلية على الاقل عشان ما تنعدم من العطور و الكريمات و الموية فدايما لا تستخسري في المجوهرات اليومية انك تدفعي فيها لانك اكثر شي راح تلبسيه كل يوم اكثر من الاطقم و المجوهرات الثقيلة حقت السهرات الي احيانا ممكن تمر سنين وانتي ما لبستيها.


2- طلة بلون واحد اسهل طريقة بانك تباني ستايلش انك تلبسين قطعتين بنفس اللون والموضة الحالية انك تلبسين ابيض كامل مثلا بلوزة بيضا و بنطلون ابيض راح تباني فرش و ستايلش و ع الموضة بسرعة و بسهولة حتى لو كانت القطعتين بيسك بدون اي تفاصيل.

3- الشنطة المنقذة  خلي عندك شنطة واحدة يومية بحيث تكوني تكفي حاجاتك كلها و ستايلش وتمشي مع كل شي و مريحة بنفس الوقت في حالتي انا تعرفون عشقي لشنطة فيليب ليم فخليكم زيي دوروا شنطة فيها كل المميزات هذه. اختاروها تكون جلد عشان ما تتوسخ واذا اتوسخت بمنديل وموية تتنظف و اختاروها بلون غامق ما يتاثر من العباية . غير هذه كله الشنطة راح تريحك بانك ما تنقلين اغراض ابدا خلاص اغراضك بمكان واحد و لا تدورين اشياء ع السريع تضيفينها.



4- السكارف طريقة مرة سهلة وبسيطة و تعطي حياة للبسك .

5- نظفي دولابك  اي شي ما لبستيه من سنة اذا ماهي قطعة مميزة وحابة انك تحتفظي بيها لقيمة معنوية او مادية وديهم لمكان التخزين اما القطع العادية الي ما لبستيها من سنة او تكون راحت موضة اتبرعي فيها وربي راح يجزيك اضعاف . ولا تفكري انك تحتفظي بشي لانه ممكن ترجع موضته ! اذا رجعت موضته راح تحسين انك ما تبغين تلبسينه لانه قديم و راح تشترين قطعة جديدة (اسالي مجرب (انا) هههههههه) . احتفظي بالقطع الي قياسها ضابط عليك اي شي يحتاج خياط وديه فورا . و اي شي ضيق صدقيني لا تنتظرين اذا نحفتي . على العكس خليه تحدي قولي اذا نحفت راح اكافئ نفسي بملابس جديدة بمقاسي الجديد. خلي كل قطعة في دولابك صالحة للبس. اي شي منتي مرتاحة فيه اتبرعي فيه و اي شي يخليك تحسين جسمك مو حلو برضوا اتبرعي فيه لانك ما تبغي تلبسي شي ما يحسسك انك Fabulous .

6- نظمي دولابك على حسب الفصول اذا دخل البرد طلعي كل الاشياء الي تنفع حطيها بالرفوف او العلاقات القريبة و بعدي كل شي خفيف و صيفي كل الشيفونات و الكروب توب و الاشياء الصيفية وديها بعيد لا تخلطينها مع الشتوي و العكس صحيح .

7- ابعدي عن الملابس الي تحتاج كوي مكثف او ما تنكوي من النشافة راح تضيع وقتك كثير اي قماش خفيف لدرجة الكرمشة انسيه.


8- جمعيها و البسيها في السيارة اذا انتي مستعجله و تبغي تلبسي اكسسوار ملفت زي سلسال ملون او كبير , اساور , بناجر , حلقان , خواتم ماهي من قائمة المجوهرات اليومية وانتي طالعة لميها وحطيها بشنطتك و البسيها في السيارة بس لا تضيعي وقتك بشي ممكن تسويه و انتي بالسيارة.

9- رف الاساسيات خلي بدولابك رف كامل للاساسيات الي تمشي مع كل شي مهما لبستي ومحتارة تختاري منها اي قطعة ومتاكدة انها راح تمشي مع اي شي واسرع شي زي ايش ؟
  •  التي شيرتات بقصة تناسب جسمك بالالوان الاساسية ( الابيض - الاسود - الرمادي ) 
  • استثمري في جينز او بنطلون اسود يكون مريح قصته مناسبه لك و قياسه مضبوط و حلو و يمشي مع كل شي ( انصحك بجينز لونه وسط لا غامق كثير ولا فاتح كثير - و بنطلون اسود ممكن يكون جينز اسود مرتب )
  • بليزر و كارديقان اسود 
  • فستان اسود بسيط بدون تفاصيل
  • القيمص الابيض 


10- جهزي لبسك من اليوم الي قبله راح يوفر عليكي كثير من الوقت.

11-  رتبي اكسسواراتك باي طريقة من طرق التنظيم الي ما تخليها تشبك في بعض لانك وانتي طالعة وحبيتي تلبسين سلسال معين ولقيتي انه مشبك بالف سلسال او اسوارة راح يسير شي من الاثنين يا تضيعين وقتك وانتي تفكينه يا انك راح  تعصبين و تقطعينه.


أتمنى ان الموضوع نال اعجابكم و يكون فادكم بأي طريقة 





You Might Also Like

8 comments

  1. الموضوع من جد مرا جميل و مرا استفدت والله يعطيكي العافية 😍❤️❤️❤️

    ReplyDelete
  2. من جد صحيح كلامك .. كل ام جديدة و حتى لو عندها سابق تجربة تحتاج انها تكون ستايلش لنفسها اولا ، كمان اضافة على كلامك مرة مهم انها تهتم بمنظر شعرها لانه مكمل أساسي للبسها

    ReplyDelete
  3. صحيح كلامك كل ام جديدة او ام بشكل عام تحتاج انها تكون ستايلش لنفسها اولا ،، كمان مرة مهم انها تهتم بشعرها لانه مكمل أساسي لمظهرها

    ReplyDelete
  4. ماشاء الله 💕 حبيت التعاون بفكرة زي كذا
    أكثر شيء يساعد في الستايل الاكسسوارات اليومية حتى لو شعرك ماعرفتي ايش تسوي فيه ولميتيه كلو بوني تل او بن الاكسسوارات بتسوي جو بالطلة
    دايم احرص على انو يكون جنب سريري صحن احط فيه اكسسواراتي اليومية لما انزلها من يدي وبنفس الوقت لما ماعندي وقت او مااعرف ايش اختار تكون قدامي وكلها ذهب 💕
    حبيت الي في الصورة من اكثر التنسيقات المفضلة عندي 😍
    جيتك من عند بيان 💐💐

    ReplyDelete
  5. حقيقي البلوق باين فيه المجهود .. ربي يسعدك غدير 💟

    ReplyDelete
  6. شكرا موضوع بطل ويسعد قلبك على فكرت رف الاساسيات *****:)

    ReplyDelete
  7. thank you this is very informative

    ReplyDelete