شنطة الـ بيركن من ايرميز ( قصتها + سعرها )

Monday, January 04, 2016


في 1981  بدات القصة !

لمن جين بيركن ( مثثلة وعارضة ازياء بريطانية )


كانت طالعة طيارة للندن على متن الطيران الفرنسي وسوولها ابقريد على الدرجة الاولى

كانت مسافرة بشنطة قش تحبها مرة زي السلة 

لمن جات تحطها فوق مكان الشنط بالطيارة طاحت وانكبت كل محتوياتها



قام الرجال الي جالس جنبها قالها " ترى تحتاجي واحدة بجيوب"

قالتله "اه اوكي ! لمن اريميز يسوو شنطة بجيوب اجيب انا زيها"

و المفاجاة كانت انه قالها "انا ايرميز وانا اقدر اسويلك واحدة بهذه المواصفات"

طلع الشخص هذا  Jean Louis Dumas  مدير ايرميز



قاموا يتكلمو سوا قالتلو لي ما تسوو شنطة اكبر من الكيلي بس اصغر من serges suitcase؟

وقامت رسمتلو و اتشاوروا

بعدها فترة وصلت لجين الشنطة !



طلبوا منها يحطو اسمها عليها ووافقت تقول مرة حسيت بالاطراء

وتقول اليوم لمن اروح لامريكا عشان اغني ( سارت مغنية ) يقولو اسمك بيركن زي الشنطة؟ تقول ايوا .. الشنطة حتغني الان

و اصبحوا ايرميز يعطونها سنويا 30 الف باوند وهيا بدورها تتبرع بيها دايما 

ومن هداك الوقت يعتبرو البركن رمز عالمي للغنا و الثروة ..

طيب ايش المميز في البيركين و لي سعرها غالي جدا ؟



أولا هي مصنوعة يدويا ويحتاج تصنيع واحدة بس 48 ساعة 

اغلاهم ال saltwater crocodile

كل شنطة داخلها مصنوع من جلد الماعز

الهاردوير حق الشنطة مطلي دهب وفيه سبشل اوردر الماس

غير انه البراند تعرض هذه القطعة لفئة معينة من الزبائن عشان تكون حصرية و تجذب الطبقة الغنية ويشعر الزبون انه متفرد 

ومتميز عن غيره



ولمن اتكلمت عن الكيلي حطيت فيديو عن طريقة صنع شنط ايرميز تقدروا تشيكي ع الموضوع هنا

شنطة الكيلي من ايرميز ( قصتها و سعرها )



عشان الواحد يحصل على ايرميز بيركن او كيلي في ويتينق لست او قائمة انتظار ممكن تصل لسنوات لين يجي دورك

لان طريقة صنعها باليد وياخد يومين انتاجها فبالتالي العدد الي يصنع في السنة محدود 

فعشان الواحد يحصل على بيركين لازم يمر بسلسلة من الافلام



في 2014 صرحت ايرميز انهم صنعوا 70 الف بيركن هذه السنة

في ابريل 2010 ايرميز صرحوا انو معد فيه ويتينق لست وانها للجميع بس هذا الكل مو صحيح غير كدا قبل سنتين انا واخواتي 

حطينا اسمنا بالويتنق لست بفرع دبي وللان لا حس ولا خبر


لانها تعتبر شنطة مرة حصرية و صعب الحصول عليها لذلك الresale value حقتها عالية وممكن تلاقيها مستعملة اغلى من 

الجديد 

في مارش 2013 بيعت واحدة منهم كانت كروكدايل احمر و هاردوير الماس في مزاد في دالاس تكسساس ب 203.150 الف دولار 



فكتوريا بيكام عندها كولكشن منها بقيمة 1.5 مليون باوند



Tamara Ecclestone سوشاليستا ومودل بريطانية تملك 30 واحدة



ليدي قاقا مشخبطة ومبهدله البركن حقتها 

طلبت من واحد من الفانس حقونها يكتب i love little mosnters tokyo love على شنطتها وهيا في طوكيو في كونسرت

اما الستدز الي هنا كانو مراهقة لعبت فيهم بمشروع diy 



اما المدلعة بنت المدلعة بنت كلينت استوود فرانسسكا اتبرعت بشنطتها البركن الكروكدايل الي قيمتها 100 الف دولار للبوي فرند 

حقها تايلر شلدز عشان يستعملها في عمل فني يحرقها باسم الفن

امحق من فن 

استوود جاها تهديدات بالقتل بعد هذه الحادثة لانه كان بامكانها تتبرع بدا المبلغ وانو الي سوته دلع و فسق

انا اوافقهم لو اعطتني هيا كان احسن



ريتا اورا انضمت كمان و مبهدله حقتها برسومات قرافيتي


اما دي الانسانة الي اسمها نيني ليكز اتوقع طلعت في ريل هاوس وايفز اوف اتلنتا جراتها وصلت انها تشخبطها بنفسها !! يا برود الاعصاب

في ويكيبيديا كاتبين انها كانت ستربر بعدين ممثلة بعدين نجمة رياليتي اوكي كذا يفسر ليش كاتبة على شنطتها close ur legs to married men !!

وفي مسلسل سكس اند ذا سيتي حصل هذا المشهد شوفوا



حاطين سمانثا رايحة ايرميز تشوف الشنطة وتشتريها

بس قالها البائع انه عليها ويتينق لست 5 سنوات

ردت عليه قالت " عشان شنطة ؟؟؟ "

قالها هذه مي شنطة هذي بيركن !

ومن هنا جات الجملة الشهيرة its not a bag its a birkin

اضطرت سمانثا تكدب عليه تقولو انها قاعدة تشتريها لممثلة مشهورة وراح تلبسها في كل مكان فقرر انه يعيد النظر في الموضوع انو يبيعها




مرة من المرات جين بركن في برنامج ياباني جابت بركن و دعستها وفعصتها تقول انها كدا تبان مميزة بدل ما تكون مملة ونظيفة 

تقول الشنطة ماهي fun اذا ما اندهكت ! 

لمن سار التسونامي في اليابان جين عرضت شنطتها اول واحدة صنعت في مزاد في ايباي وانباعت ب 160 الف دولار اتبرعت

 بيها لجمعية الصليب الاحمر البريطانية عشان يساعدو اليابانيين



السنة هذه جين بركين فجاة طلبت من ايرميز يسحبو اسمها من الشنطة لانها شافت فيديو فيه تمساح يتعرض للتعذيب عشان ياخدون

 جلده وينحط بشنطة بركن

وسارت مشاكل بينهم ومفاوضات و ايرميز نفوا الخبر وقالوا هم يتبعون النظام العالمي في هذه العملية وما يعذبون حيوانات و و و و

وبالاخير اتفقوا انهم يحرصون على انه مافي تعديب للحيوانات و يخصصون جزء من ربحهم السنوي تبرع لجمعية PETA

طيب نجي للسوال الي محير الجميع كم سعر شنطة ايرميز بيركن ؟

على حسب المقاس بس تبدا من الجلد التوقو ( ارخص جلد عندهم ) مقاس 25 سم 5900 يورو  يعني 30 الف ريال

كيف تحصلي عليها ؟

 في موضوع منفصل راح انزله قريب عن كيف تحصلي عليها بدون قائمة انتظار سواء هيا او شنطة البيركن من ايرميز

انتظروني 

You Might Also Like

4 comments

  1. مشكورة على الموضوع 👍👍😍ممتع جدا

    ReplyDelete
  2. حبيت الموضوع وطريقه سرده كانها قصه او دروس في عالم الموضه وتاريخها xD
    انا صراحه اليوم طحت على موقعك ❤️3❤️ا
    يعني جداَ جداَ مفيد
    فيه بعض المواضبع قديمه سنه 2013 كانت بالإنجليزي هل كنتي تستهدفين الأجانب <<سؤال راودني-3-"ا
    وحبيت ببعض المواضيع اولها إنجليزي وبعدها عربي اتمنى كله عربي :(
    يعني كاني اقراء مجله صراحه حيل حلو سردك , موفقه يا غدير ❤️0❤️ا

    ReplyDelete
  3. ❤️❤️❤️❤️❤️❤️❤️❤️❤️

    ReplyDelete