Fashion Terms Series part 3 مصطلحات في الأزياء ومعانيها الجزء الثالث ( اشكال و انواع الشنط )

Monday, December 21, 2015



 السلام عليكم 

كيفكم بنات ؟ 

يوم راح اكملكم سلسلة موضوع مصطلحات في الفاشن ومعانيها المقصد هنا اسامي القطع و الفرق بينهم

عشان زي ما قلت من قبل يسهل عليكم انكم تبحثون عنها اون لاين او لمن تروحوا المحلات تبغوا تشتروا

اللي حابة تتطلع على الجزأ الأول هذا عن الفرق بين قطع الآوت وير عموما من جاكيتات وكوتات 

و الجزأ الثاني كان عن الفرق بين الجمب سوت و البلاي سوت و التراك سوت

أما جزأنا الثالث اليوم بتكلملكم عن انواع الشنط و اشكالها و قصاتها المختلفة و اسم كل موديل

ونفتتح بالأشهر


1- Tote Bag : اشهر تصميم للشنط العملية اليومية تكون بحجم وسط او كبير نسبيا عشان يكفي كل الاغراض اليومية و خلال السفر لها سيرين تحمل على الكتف و مفتوحة من فوق مو مقفلة


2- Bucket : بكيت يعني دلو الشنط الي بهالشكل الي يشبه شكل دلو الماء وتنقفل زي البقشة بخيط او حبل ينشد


3- Hobo : شنطة الهوبو .. الهوبو يعني متشرد لمن تترجم بس جائت التسمية من المتشردين زمان لمن كانو يحطوا عصا وفوقها بقشة من القماش فيها اغراضهم .. طيب ايش هيا شنطة الهوبو ؟؟ هيا شنطة على الكتف ما تنحمل غير على الكتف و يكون شكلها نصف هلال وما تكون واقفة بالعكس تكون خامتها طايحة ومترهلة وتتجعد اذا وضعت على اي سطح.



4- Messenger : المسنجر من اسمها يعني الرسول سميت بكذا لان هذا الشكل من الشنط كان يستخدمها من قبل ساعي البريد لمن يوزع البريد شكلها مربع او مستطيل و لها حبل طويل تنلبس في الغالب كـ كروس وكمان غالبا للرجال.



5- Duffle : هي شنطة اسطوانية كبيرة الحجم و من خام ثقيل و يتحمل تتستعمل للنادي عشان ينحط فيها الادوات الرياضية و للسفر.  طيب ليش اسمها دفل ؟ لان من اوائل الناس الي استخدموا هذا الشكل من الشنط كانو يجيبوا الخام الخاص لصنعها من مدينة دفل في بلجيكا و من هنا اخدت اسمها وبعض الاحيان تسمى weekend bag.



6- Doctor : شنطة كبيرة من الجلد كانوا يستعملوها الدكاترة في العصر الفكتوري قفلتها من فريم او ايطار معدني القاعدة حقتها مسطحة و الوجهين مدورة شبه الاسطوانه شوية .. فكرة الايطار الحديدي للقفلة عشان يقدر الدكتور يفتحها للاخر ويشوف كل شي موجود بالشنطة.



7- Bowler : تشبه الدكتور باق شوية لكن مدورة اكثر خامتها كلها تكون واقفة وماسكة نفسها كانو يستعملونها لحمل كور البولينق ومن هنا اخدت اسمها و بعد كدا سار اي شنطة تاخد هذا الشكل او شكل شنطة السبيدي من لوي فيتون يسمونها بولر باق.



8- Clutch : اي شنطة تمسك باليد بدون اي حبال .



9- Box : الشنط الي تاخد شكل البوكس او الصندوق غالبا تكون مربعة و مسكتها قصيرة بس اطورت الان و سارو يضيفون لها ستراب طويل .



10- Wristlet : هي شنطة صغيرة جدا فيها ستراب يدخل بالكف زي الاسوارة



11- Envelope : شنطة تحمل بالكف يكون شكلها نفس شكل ظرف الرسائل.





12- Camera : الشكل هذا من الشنط كان يستعمل زمان لحمل الكاميرات ولهذا السبب سميت كدا بس ما سارت للكاميرات سارت شنطة عادية بس احتفظت بهذا الاسم تكون مربعة ولها ستراب واحد طويل.



13- BackPack : شنطة الظهرنفس شنط المدرسة .






14- Drawstring : اي شنطة تقفل بنفس الطريقة الي في الصورة بحبل نفس البقشة. القفلة هذه تستعمل في البكيت باق الي ذكرتها فوق و كمان في نوع من شنط السهرة صغيرة جدا وتكون غالبا مطرزة تقفل بنفس الطريقة بس مرة قديمة معد احد يلبسها.




15- Minaudière : شكل من اشكال الكلتش تكون مربعة او مستطيلة قاسية من اكريليك ولا خشب ولا معدن ممكن يكون ملبس باي قماش او تطريزات او اي شي يزينها بس لازم تكون قاااسية تستعمل في السهرات.




16- Satchel : شنطة كانت تستخدم فقط لحمل الكتب لها فريم او ايطار مستطيل اسفلها مسطح ولها سيرين باليد و الكتف وتغلق بسحاب او اي نوع من انواع الاقفال بس ما تكون مفتوحة ابدا .


17- Baguette : شنطة صغيرة السير حقها  قصير و مستطيلة الشكل تشبه خبر الباقيت الفرنسي ومن هنا جات تسميتها باقيت



18 - Saddle : شنطة تشبه سرج الحصان .. سرج الحصان فيه شنطة صغيره لحفظ الحاجيات و الاغراض اخدوا هدا التصميم  و القفلة بالحديدية وسووه على شنطة تستعمل للناس مو للاحصنة.


19- Shopper : شنط التسوق تكون من قماش خفيف جدا نيلون او قطن او بلاستيك يتحمل اغراض التسوق مو الاغراض الشخصية لا . الفكرة انو في كثير ناس تحب تحافظ ع البيئة وما تستعمل اكياس المحلات وكمان عشان لا تكثر الاكياس عليهم وقت التسوق فيشيلو هذه الشنطة كل ما يشترو شي بالسوق يحطوه داخلها. انا شخصيا ساعات استعملها لمن اكون رايحة مكان او رحلة وابغى اشيل سناكس او مشروبات او مسوية قهوة ابغى اخدها معايا الدوام اكبر مثال عليها اكياس تيد بيكر وهارودز الي الناس تعتبرها شنطة وهوا غلط هي شنطة تسوق وحمل اغراض ولو تلاحظوا بالصورة هيا شايلة شنطة سودا و وبيدها الشوبرباق او الكيس اللي مكتوب عليه هارودز. كمان من اشكالها الاكياس الخيش و القماش الخفيف الي تشوفوها في كل المحلات في قسم الاكسسوارات .


You Might Also Like

4 comments

  1. حبييييييت الموضوع .. يعطيك العافيه

    ReplyDelete
  2. I looovee how your posts are educational and fun at the same time ,,

    ReplyDelete
  3. that was soooooo informative, thank you so much ghadeer xoxo

    ReplyDelete