Review : Beauty Blender in original, and Micro (Mini) size !

Tuesday, September 01, 2015


سارلي استعمل البيوتي بليندر سنتين او اكثر من يوم ما اعلنوها الور انها منتج السنة اتوقع في 2013 فاقدر اقول اني جربتها فترة طويلة و اقدر احكم عليها واقدر اشرحلكم عنها اكثر


اول شي ايش هي البيوتي بليندر ؟
هي اسفنجة غير عادية تحطي فيها منتجات الوجه وتطلعي بنتيجة احترافية بدون تخطيط ولا بقع شكلها يشبه البيضا يسمحلك تستعملي الطرف السفلي في الدمج ووضع الكريم او الفونديشن على مساحات واسعة و الطرف العلوي الحاد تستعمليه في الاماكن الضيقة في صنعها استعملوا تقنية الخلية المفتوحة الي تسمح بان الموية تدخل داخل الاسفنجة و تكبر شوية بالتالي لمن تحطي المنتج يظل في سحط الاسفنجة ما يدخل جوا وما تضطري تستعملي كمية كبيرة من المنتج 

كيف استعملها؟
أول خطوة : تحطي الاسفنجة تحت الموية و تلاحظي انها كبرت في الحجم بعدين تمسكي منشفة او منديل و تعصريها بقوة عشان تخرج الموية الزايدة
اذا تبغي تستعمليها للفونديشن : وزعي الفونديشن على وجهك باي فرشة او ممكن تحطيه على الاسفنجة على طول ( على حسب ايش تفضلي طريقة ) شخصيا اوزعه بفرشة بعد كدا امسك البيوتي بلندر و اطبطب على كل وجهي وادمج الين احصل على الفينيش المطلوب ويكون كل شي اتوزع بالتساوي 
اذا تبغي تستعمليها للبودرة : للبودرة ممكن تستعمليها رطبة وممكن تستعمليها جافة اذا رطبة تاخدي البيوتي بلندر وتاخدي بيها منتج من علبة البودرة و تطبطبي على وجهك واذا جافة نفس الشي الموضوع يرجع لانتي ايش تفضلي و ايش تحبي وايش ناسبك لانه كل بشرة تختلف عن الثانية وكل واحدة والي يناسبها
اذا تبعي تستعمليها للكنتور : نفس الشي تصلح للكنتور الكريمي فقط ما حسيتها تنفع الباودر ابدا ابدا ابدا تكوني حاطاه موزعاه على وجهك بالفرشة و تبداي تدمجي بالطبطبة بالاتجاه الي تبغيه سواء على فوق او تحت او بطريقة دائرية على حسب طريقتك في الكنتور ويفضل تستعملي الطرف الحاد النحيف منها عشان لا ينتشر في كل الوجه
اذا تبغي تستعمليها للكونسيلر : برضو نفسس الطريقة تكوني موزعة الكونسيلر تحت عينك و تبداي تطبطبي بالطرف الحاد النحيف منها 

ليش استعملها؟
انا اعتبرها منتج سحري يقلبلك شكل الفونديشن فوق تحت مستحيل اي منتج ثاني يوصل للنتيجة الاحترافية في فينيش الفونديشن بالذات بالطريقة هذه. لا الفرش ولا الاسفنجات الثانية الي تقلد البيوتي البلندر تعطي نفس النتيجة أبدا لا ريل تكنيك ولا غيره.

تستحق اني اشتريها؟
اصلا ليش ماهي عندك الى الآن ؟؟؟ ما ينفع اي بنت يكون ما عندها حقيقي 

ايش الفرق بين الالوان؟
اول واحدة طلعوها الاورجينال الفوشية بعد كدا طلعوا لون ابيض و اسود كألوان دائمة ماهي ليميتيد لفترة محدودة مافي اي فرق في تركيبتهم اللهم ملاحظتي الوحيدة و الي كاتبينه في الموقع انه البيضا للاستعمال مع السيريم و البرايمرو كريمات العيون بحكم لونها بس انه ابيض زيهم و شفاف و السودا مع المنتجات الغامقة زي البرونزر و الكنتور 
وكل فترة ينزلوا الوان لفترة محدود زي الموف و الاحمر مافي اي فرق بس لون خدي الي تفضليه ويعجبك!

طيب ايش الفرق بين الأحجام؟
الحجم الاوريجينال مناسب للمساحات الواسعة و الضيقة 
الحجم الميني او المايكرو بعد تجربته حسيت انه فيني من زمان عنه؟ مع اني في البداية ما اقتنعت حسيت بس زيادة برودكت ع الفاضي بس فعلا حجمها الصغير يسمحلك انك تدمجي الكونسيلر (خافي العيوب) و الكوركتر (المصحح) تحت العين و حول الانف و زوايا العين الداخلية بطريقة أنظف و أرتب لان الحجم اصغر فيعطي قدرة تحكم أفضل
وكنت احس البيوتي بليندر الأوريجنال لمن ادمج فيها كونسيلر تمتص كثير منه على عكس الحجم الصغير ممكن السبب لانه فيه تحكم اكثر فحسيته اعطى نتيجة و تغطية افضل بس ما اعتبره شي اساسي لكل البنت بس اذا كنتي تحبين الميك اب بزيادة وحابة مكياجك يكون انظف و انظف و اسهل بالدمج فخديها غير انهم يجون قطعتين مع بعض فلو واحدة وسخة استعملي الثانية
و الصراحة its too cute to ignore 

كيف ومتى انظفها ؟
يفضل تنظفيها بعد كل استعمال عشان لا تتراكم فيها المنتجات و تكون فطريات داخلها وعفن و بالتالي تخرب بشرتك فنظفيها بعد كل استعمال يا اما بالصابون الخاص فيها او اي صابون عندك معقم انتي و طريقتك في التنظيف
وممكن من فترة لفترة تبخين عليها بخاخ كحول على اساس يعقمها زيادة بس لاتكثرين منه لانه ممكن يسبب تآكل 

فين احصلها وكم سعرها؟
في سيفورا
 الاسعار تختلف على حسب ايش معاها
البيوتي بليندر الاورجينال الفوشية لحالها 80 ريال
البيوتي بليندر الاوريجنال الفوشية مع صابون صلب 95 ريال
البيوتي بليندر الميني او المايكرو حبتين مع بعض ب 70 ريال
الصابون الصلب الخاص بالتنظيف ب 65 ريال 

توضيح : بيوتي بلندر اسم الماركة المسجلة يعني ما ينفع اقول على اسفنجة شركة ثانية  او ماركة ثانية بيوتي بليندر. نقول عليها اسفنجة وجه بس التابعة للماركة الفلانية او عاد اذا هما سموها اسم هذا شي ثاني بس ما تعتبر الاسفنجات الاخرى بيوتي بليندر

You Might Also Like

0 comments