Education : What is Fashion Week ?

Tuesday, September 08, 2015






بما انه الفاشن ويك راح يبدا في نيويورك بعد يومين ( سبتمبر 10 )
بدات تجيني اسالة ايش الفاشن ويك او اسبوع الموضة و ايش قاعد يسير وهوا ليش اكثر من واحد بالسنة وليش في اسبوع الموضة في نيويورك وليش فيه في لندن و لي فيه في باريس ؟ 
في هذا البوست راح اشرحلكم كل حاجة ! وراح احطلكم لنكات فين ممكن تتباعوه و الجداول 



ايش هوا اسبوع الموضة ؟
هوحدث يخص الناس المهتمة بالموضة و الأزياء من أصحاب محلات , محللين موضة و أزياء , محررين , مصممين , مهتمين و اي شخص وظيفته و عمله او حتى شغفه الموضة ! 

ايش الفايدة منه ؟
في اسبوع الموضة الماركات و المصممين يعرضون بضاعتهم حق الموسم القادم و يتحدد ايش الي راح يكون دارج وايش الي ماراح يكون دارج يعني اسبوع الموضة الي يقام في سنة 2015 كمثال يعرض موضة و اللبس الي راح يتوفر للبيع في سنة 2016 يعني هوا سابق لآوانه يعرض ايش الي راح نشوفه السنة الجاية هذا يعطي فرصة لمسؤولين المشتريات (اصحاب البوتيكات و المحلات عندهم شخص وظيفته اسمها buyer  او مسؤول مشتريات)  انهم يحجزون و يختارون طلبياتهم و قطعهم للموسم القادم.
يعني كمثال الديبارتمنت ستورز الكبيرة زي ساكس , بارنيز , نوردستروم , رباعيات عندنا , بلومينق ديلز ,,, الخ كل محل منهم لكل فرع بالعالم عندهم مسؤول مشتريات يحضر اسابيع الموضة يختار القطع الي راح تكون موجودة بالمحل للوسمم القادم و يسوي طلبية عليها.
و الموضوع لا يشمل فقط الديبارتمنت ستورز الكبيرة ! لا ! يشمل البوتيكات الصغيرة , مواقع التسوق لالكترونية , ستايلستس الفنانين الي يحطون عينهم على قطع يجهزون فيها دواليب الفنانات للمناسبات القادمة من حفل توزيع جوائز اوسكار , قولدن قلوبز .. الخ
غير جانب مسؤولين المشتريات او البايرز ,, محللين الموضة و الازياء ياخدوا كدا نفس طويل و يتفرجو و يحددو ايش الموضات الي راح تكون في الموسم الجاي و نلاحظ بعد اي اسبوع موضة تبدا تطلع التقارير من اهم المجلات زي فوغ و ايلي و غيرهم.
مين كمان مهتم و يفيده الحضور ؟ الفنانين يشوفون و يستوحون لطلاتهم القادمة و في نفس الوقت حضورهم دعاية للمصمم نفسه فنلاقي بعض المصممين يختار بعناية مين يحضرلهم من فنانين عشان يسبب ضجة و ياخدون صور كثيرة لعرضه.


ايش المدن الي فيها اسابيع موضة ؟
الرئيسية هي نيويورك , ميلان , لندن , باريس عواصم الموضة ال4 الرئيسية ! لكن فيه مدن اخرى يسوون فيها اسبوع موضة !
هذي الأساسية و الرئيسية فقط و الي اهم الماركات و المصممين يعرضون فيها .

هل هو فعلا اسبوع ؟
المدة على حسب الجدول وعدد المصممين ودور الازياء المشاركة بس غالبا يكون مدته من 5 الى 8 ايام يعني المعدل الوسطي تقريبا 7 ايام عشان كذا سموه أسبوع الموضة في كل مدينة يكون اسبوع تقريبا وينتقل للمدينة الي بعدها

ايش السبب انها في اكثر من مدينة ؟
المصممين الامريكان غالبا يعرضون في نيويورك لانه مقرهم هناك و المصممين البريطانيين مقرهم لندن و الايطاليين ميلان و الفرنسيين باريس وهكذا !

طب هل هذا يعني انها بالجنسية ؟
لا مو شرط بالجنسية اي مصمم يقدر يشارك في المدينة الي يبغاها بس كل سنة يكون بنفس المدينة يعني مثلا ايلي صعب لبناني بس عرضه كل سنة في باريس 

اي مصمم يقدر يعرض في اسبوع الموضة ؟
لا برضو مو اي مصمم يقدر يعرض او يحصل فرصة انه يعرض شغله في اسبوع الموضة في الجدول الرسمي لها شروط و اشياء كثير وتفاصيل انا ما اعرفها
بس!!
اذا الديزاينر او البراند حاب ينظم بنفسه Off schedule show يقدر طبعا بس التكاليف مهولة ! لازم يجهزون المكان من الى بـRunway او منصة عرض و اضائات و مهندسين صوت ومهنديسين اضاءه و سكيورتي و و و 

كم اسبوع موضة يسير بالسنة ؟
الي في ال4 عواصم الاساسيه يحصل الحدث مرتين بالسنة مرة لعرض تصاميم الربيع و الصيف ومرة لعرض تصاميم الخريف و الشتاء. اسبوع الموضة حق الربيع و الصيف دايما يبدا من سبتمبر لاكتوبر و اسبوع الموضة حق الخريف و الشتا يكون في فبراير لمارس. التواريخ تحدد وتتغير كل سنة من قبل المنظمين بس تكون في هذه الأشهر.

ايش قصة الستريت ستايل الي يصاحب كل اسبوع موضة و الصور الي تنتشر ؟
المكان الي يسووه في عروض الازياء برى يكون مليان بالناس الي تحب الموضة و تحب اللبس من مودليز من ايديترز من بلوقرز من ستايلستس يلبسوا احلى ما عندهم وهما جايين العروض و بعضهم ما يدخلوا العروض و ما يقدرو يحصلوا على دعوة او طريقة للدخول للعرض فيجلسوا برى يستنوا المصورين يصوروهم.
المصورين يحبوا يجو ياخدوا صور للموضة الموجودة ايش لابسين المشاهير , الناس العاديين , البلوقرز و ينشروها في مواقعهم و بعض المصورين يكونوا تابعين لمجلات.

نقدر نتفرج من البيت ؟
اكيد لهم موقع خاص اسمه فاشن ويك اون لاين او FWO تقدروا تختارو فوق المدينة و تشوفوا جدول العروض و الاوقات و تقدروا تضغطوا على اللايف ستريم تتفرجو لايف كل العروض الرابط هنا 



You Might Also Like

6 comments

  1. I always love your educational posts! keep it up 3>

    ReplyDelete
  2. Loved it so perfect and organized
    Keep going <3

    ReplyDelete
  3. الله ينور عليك ويبارك فيك

    ReplyDelete
  4. الله ينور عليك ويبارك فيك

    ReplyDelete