Istanbul Historical, Tourists, Food, and Shopping spots ♥ الأماكن السياحية , المطاعم , و التسوق في اسطنبول ♥

Thursday, August 20, 2015





تركيا وما أدراك ما تركيا .. بالنسبة ليا من اكثر الدول الي زرتها ومرة مرة مرة حبيتها ومستعدة ارجعلها الف مرة وما اطفش 
رغم ان اول زيارة لتركيا مو من زمان بس سارت ماي فيفوريت سبوت 
فين يكمن جمالها ؟ في انها بلد تجمع كل شي !! 
حضارة و تاريخ , طبيعة و مدينة , بحر و بر , الأكل فيها منوع و لذيذ جدا , وسائل المواصلات سهلة وميسرة 
يعني كل احد يقدر يلاقي الي يعجبه ايش ماكان جوه و هواه 
جاتني طلبات كثيرة جدا وملحة في اني أكتب ايش أحلى أماكن أنصح بيها في اسطنبول 
فسويتلهم هذا التقرير البسيط انشاء الله ما اكون نسيت شي و اتمنى انكم تستفيدوا منه ويكون مرجع لكم !







الأسواق :

1- استينيا بارك  مول كبير مرة وفيه البراندز الهاي اند و الهاي ستريت و التركية المحلية في مطاعم وكافيهات كثيرة يستحق الزيارة

2- كانيون مول سقفه مفتوح مرة لطيف من المحلات الي ما تلاقوها الا فيه محل خاص لاشياء كوكاكولا اكسسوارات بيت ومواعين وملابس ...الخ

3- زورلو مول صغير مرة فيه كم محل وفي مطعم جيمي اوليفر و قودايفا كافيه وفي فرع للديبارتمنت ستور التركي فاكو وفي قسم خاص لفساتين العرايس من ارخص شي لزهير مراد وفساتين مرة حلو وطرح و كعوب عرايس كل شي يخصهم

4- اكمركز : منوع فيه كل شي بس الاسواق الباقية في رأيي افضل منه

5- البازار المصري و السوق المسقوف لاصقين في بعض اذا رحتي واحد وانتي تمشي فيه حيوصلك للتاني مرة حلو للاشياء الشعبية و البهارات و الحلويات و التحف و الهدايا و البن التركي و المواعين التركية حتى لو ماتبغوا تشتروا حاجة لازم تروحوا لان الاكسبرينس حلوة مرة

6- شارع استقلال متفرع من ميدان تقسيم كله شوبنق من اوله لاخره

7- شارع بغداد في الجزء الآسيوي من اسطنبول نفس افكار شارع الاستقلال كله محلات تسوق

8- شارع نشانتشيه في منطقة شيشلي في كل شي من براندز الهاي اند للهاي ستريت للمحلية و فساتين سهرة وحتى محلات جملة و اقمشة موجود فيه 

9- جواهر مول فيه كل البراندز المحلية و العالمية ( مافي هاي اند ) المميز فيه كشك يبيع صابون صنع يدوي وبمواد طبيعية على اشكال فواكه كانه فاكهه حقيقية و ريحتها تجنن ودك تاكليها اكل لا تفوتوها خدوا منها 

10- برج ترمب 




مطاعم فطور :
1- مادو بكل مكان وزمان كل منطقة وسوق فيه فرع 

2- لوكمة رائع رائع رائع عليه طلة ما تتفوت وقعدة ترد الروح يطل ع البسفور بينه وبين البسفور شارع لكن تشوفيه من مكانك بوضوح 

3- سوتس في شارع اميرجان

4- هابيلي ايفر افتر في شارع او كورنيش الببك

5- عشق Assk ع البسفور كمان

6- لافيان روز فطور وحلى مرة جميل



مطاعم : 

1- نصرت يقدم لحوم , ستيكات , و برقرفقط ماعندهم شي دجاج ولا فيجيتيريان فاذا كنتي ما تاكلي لحوم ماراح تلاقي شي 
احب الكفتة المحشية جبن حقتهم , و اللوكم ( ستيك مقطع ) و برقر اللوكم مرة لذيذ 
لازم تجربو البقلاوة المحشية ايس كريم حقتهم ما تتفوت لهم اكثر من فرع

2-كوك شوب نفس الي بجدة بس يظل الاصل اسطنبول 

3- اولوس 29 مره حلو و الفيو جميل على الجسر بس بعد 12 للكبار فقط :P

4- اولوس بارك مطعم وكافيه للامانة ما قد جربت اكل فيه كل مرة اروح اطلب مشروبات وحلى بس عندهم فيو ما يتفوت ابدااا
اجباري تروحوا في النهار جميل جداااااا مكانه في منطقة مرتفعه فالفيو جمييييل تشوفي الجسر و البسفور من ارتفاع 

5- زوما الياباني نفس الي بكل بلد وما يخيب ظنك في ولا بلد

6- مطعم الي بفندق ذا هاوس في ارتاكوي (في فندق ذا هاوس بنشانتشيه انتبهوا ) اكل لذيذ و الجو بالمكان حولينك رائع (رحته بالليل) في طاولات مقابله للبسفور وفي بالنص الي مقابله للبسفور حقت 2 بس مرة قعدة رومانسية رااائعة ما تتفوت

7- هوكا مره قعدة حلوه سواء نهار او ليل ينفع عشا وحلى ميزتهم يفتحوا لوقت متاخر للساعة 4 الفجر ف الويك اند مكان مرة ترندي ودايما زحمة ممكن تنتظروا كثير

8- قهوة حافظ مصطفى اتوقع موجودة في اكثر من منطقة ومكان عندهم الذ كنافة جبنة و القهوه التركي حقتهم بالمستكة فظيعة نصحتني فيها واحدة صديقتي وكل ما اروحلهم واكل ادعيلها :P انا الفرع الي اروحوا في تقسيم قدام الميدان بالضبط

9- ليموناتا الي في برج ترمب المكان مرة لطيف وترندي و الأكل رائع بس مو سياحي محلي شوية يعني تحسوا تشوفوا الاتراك اكثر بس الاتراك النظاف حبيت البيتزا التركية حقتهم و الداينمنت شرمب

10- بيبر مون مطعم ايطالي لذييييذ في مول اكمرمكز 

11- جينا ايطالي ممتاز في كانيون مول

12- فندق الفورسيزن في كافيهات حلو ورايقة مرة خصوصا التراس مطل ع البسفور

13- كمبنسكي الفندق نفس فورسيزن قعدات حلوه ورايقة في كافيهات وفي مطاعم ومطلة ع البسفور كمان الفندق مرة جميل وكل روؤساء الدول و الفنانين قد نزلوا فيه حاطين جدار كامل بصورهم الفندق كان قصر عثماني لاستقبال الضيوف و اقامة الحفلات حولوه لفندق 




أماكن تستحق الزيارة للي جاي اسطنبول لاول مرة : 

1- قصر توب كابي ( قصر السلطان سليمان و السلطانة هيام )

2- المتحف الاسلامي (قصر ابراهيم باشا ايام الدولة العثمانية )

3- المسجد الازرق او جامع السلطان احمد

4- مسجد آيا صوفيا 

5- قصر دولما باشا

6- منطقة ارتاكوي رائعة كلها اكشاك وافل و بطاطس الكومبير التركية الي يحشونها لك الي تبغي وفي كافيهات ومطاعم تشتغل لوقت متاخر بالليل فيه مطاعم مرتبة ومطاعم شعبية و كافيهات مرتبة وكافيهات شعبية يعني كل حاجة ترضي كل الاذواق و في بعض محلات التحف و الهدايا حلو بالعصر وحلو باخر الليل لمن كل الاماكن تقفل المنطقة حيوية بالليل وما تخوف 

7- الرحلات البحرية في البسفور حلوة وما تتفوت فين تلاقوها ؟ عند قصر توب كابي ومنطقة السلطان احمد تلاقوا كثير منتشرين معاهم ورق كل واحد يقنعك تطلعي الرحلة حقته اختاروا الي يناسبكم ولا تطولوا اكثر من ساعتين بتكون مملة ولاتاخدوا الي باكل لان الاكل سيء و خدوها بالنهار افضل

8- اكوافلوريا ملاهي مائية



أماكن مشهورة اعتبرها مضيعة وقت وما عجبتني ( رأي شخصي ) :

1- منطقة أيوب فيها مسجد ابي ايوب الانصاري المسجد لمن رحنا كان مغلق و المنطقة بعيدة ومملة جدا مافيها لا مطاعم ولا محلات ولا اي شي عدل 

2- كافيه بيير لوتي في منطقة ابي ايوب الكافيه مرة مشهور بزيادة الوصول له مرة صعب في منطقة مرتفعة 
عيبه مافي حجز ولا موظفين عدلين يرتبوا المكان (مونظيف) ولا حتى الدخول بالدور من سبق لبق
اول ما تلاقي طاولة تجري تجلسي كاننا في لعبة الكراسي وما يقدموا الا قهوه تركي حاف و شاي فقطططط 
للامانة الفيو حلو مميز بس مشابه لفيو اولوس بارك شوية بس ما يستحق التعب و الوقت 

3- ميدان تقسيم يعني حلو الواحد يروح هناك مرة مو  اكثر ما احبه ابد كله شحاتين و العرب النصابين الي يجروا وراكي يطفشوكي ما ت قدري تستمتعي بوقتك ابدا الاكل و المطاعم فيه سيئة جدا جدا و الكافيهات مستواها متدني 

4- مطعم المدينة الكل يمدح فيه و عندهم جدار كامل بصور الفنانين الي زاروهم منهم اليسا و احلام وجورج وسوف و كاظم الساهر ...الخ بس المكان اقل من عادي و الاكل عادي جدا مافيه شي مميز ما يستحق العنوة

5- مطعم حمدي اكبر مقلب في تاريخ البشرية لقيت في النت مدح كثير عليه انه اذا كنتوا حول البازار المصري روحوه الصراحة ما ارضالكم هيا ياويلكم تروحو ههههههه تحذير قوي يعني ما ارضاها لاحد مضيعة وقت وفلوس الاكل سيء الخدمة سيئة عرفتوا الاماكن الي يتكلمون عربي و يضحكون ع العرب و يجيبولهم طلبات مو حقتهم بالفاتورة و ينزلولكم اشيا ما طلبتوها ع اساس انها فري بعدين فجاة ف الفاتورة نازلة لدرجة حتى تدفعين حق التيبل الوير الصحون و المنديل ياريت على اكل طعم الله يعز النعمة

6- مطعم بالي بيك (حق الممثل التركي الي سوا دور بالي بيك في حريم السلطان) المطعم ما يقدم الا اسكندر و كنافة مدري بقلاوة و شاي و قهوه للامانة هوا لذيذ بس سوو حركة مرة رخيصة انه يعطون العرب منيو بالعربي لمن قارنته بالمنيو التركي و الانقليزي الاسعار بدون مبالغة الدبل فحركة رخيصة جدا جدا جدا 

7- جزيرة الأميرات (بيوك آضه )  ما تستحق الوقت و المشوار تروحون لها من احد الموانيئ بعبارة ريحتها معفنة للاسف لان وسيلة التنقل فيها الاحصنة بس مافيها سيارات ففضلاتهم بكل مكان و الاكل فيها سيء جدا

8- بورصة  ممكن كثير ما يوافقوني بس اشوف الروحة لها مكلفة على قل سنع ما يسوى الشحططة و المشوار .. بالعبارة ساعة و 40 دقيقة رايح و ساعة و 40 دقيقة جاي و لمن توصلوا مافي تاكسي فيستغلوكم اشد استغلال عشان يطلعوكم فوق الجبل المنقطة السياحية الي المفروض اهم شي تنزار في بورصة جبل الأولوداغ المشوار له مرة متعب و غالي و فيه ركوب تلفريك بعد السيارة في الاخير توصلوا اممم اوكي منظر حلو بس كم اجلس فيه ربع ساعة ؟ نص ساعة ؟ ساعة ؟ و بعدين ؟؟ ههههه ما ادري ما حبيت ابدااااااااااااااااااااا وفوق فيه جلسات يعطونك عدة شوي و دجاج وتشوين بنفسك و تاكلين فل طبعا ما لقينا ولا احد فاضي يمكن للعوائل الكبيرة اكتفتي حلو بس انا وزوجي طفشنا طفششششش وحرفيا اتصورنا ومشينا فورا رحنا السنتر في بورصة برضوا ما عجبنا ورجعنا على اسطنبول 
يقولوا التسوق فيها ارخص بكثير من اسطنبول بس في النهاية انتي دافعة الفرق في المشاوير يعني هيا هيا ما فرقت 



ماركات ملابس تركية : 

Twist
Hotic
Machka
Muddo
 Vakko
Baymen

*فاكو و بايمين هيا  ديبارتمنت ستورز فيها ماركات كثيرة معروفة و عندهم لاين او خط ملابس و اكسسوارات خاص فيهم 



متفرقات :

1- صيدلية قراتيس هي درق ستور فيه ماركات ميك اب مو متوفرة عندنا ودايما عروض و تخفيضات عندهم ذا بالم و ويت ان وايلد تلاقونهم بكل شارع وسوق

2- صيدلية واتسون درق ستور كمان عندهم ماركة NYC

3- محل انقلش هوم باغلب الاسواق اشياء البيت حقتهم تجنننننننننن و باسعار رخيصة جدا جدا مواعين و اطقم لحف و لوح واشياء ديكور 

4- مدام كوكو نفس الشي محل لاشياء البيت مرة حلوة والاسعار مو طبيعية و الكواليتي ممتاز عن تجربة



التاكس في تركيا :

كل شي 8%
المجوهرات 12%
استرجاعها بالمطار دقيق ويطلبوا يشوفو القطع اول ما تدخلوا المطار بتلاقون موظفات يشرحونلكم طريقة الاسترجاع افهموا منهم الخطوات ووين تروحون قبل ما تسوو تشك ان وقبل ما تشحنوا الشنط ضروري 
يرجعولك المبلغ يورو او دولا
اذا دولار مافيها مشكلة اطلبوهم دولار
المشكلة اذا رجعوه يورو ينخسف نص المبلغ لان تحويل عملتهم لليورو يطيح من قيمتها كثيييير
انا جربت رجعتهم دولار كان الفرق بسيط
لكن في مرة قالو مافي دولارات و اجباري اخدت يورو تقريبا 1000ريال طارت مع التحويل 
في خيار تطلبوها ع الكردت كارد اتوقع افضل ما جربته

الجوالات و الانترنت :

شرايحهم مو رخيصة ولا الانترنت رخيص اذا جالسين اسبوع انا افعل حق موبايلي الانترنت الدولي الي بمبلغ معين عدد جيجات معينة ارخصلي بكثير اخر مرة 2 جيجا ب 140 ريال
فاذا في عروض من شركة الجوال الي تستعملوها حلوة خدوها افضل

المشكلة التانية انه اذا زرتي تركيا مرة ثانية بنفس جهاز الجوال ما تقتدري تستخدميه و لاتحطي فيه شريحة تركية
من باب الأمان يبغونك تسجلين جوالك في مكتب ضراب و تدفعي مبلغ حوالي 200 ريال اذا ما خاب ظني بس عشان تسجلي الجوال وتقدري تستعمليه بعد كدا تروحي محل الجوالات و تشتري شريحة وتشغليها (طولوها وهيا قصيرة ما اعرف ليش)

معلومة ما ادري تضحك ولا تبكي :

الهاند سناتيزر ما يعترفوا بيه وجلست ادور كل المحلات ابغى مافيه حتى باث اند بودي وركس و ذا بودي شوب مافيهم هذا المنتج و لا يعرفونه
دورت بالصيدليات كمان مافيه 
احرصوا انكم تجيبوا مخزون معاكم لانكم بتكونوا برا طول اليوم و بتلمسوا 100 شي وبعدين راح تجلسو في مكان و تاكلوا 


كيف نروح الأماكن الي قلتي عليها ؟

كل الأسواق لها مواقع باللغة الإنجليزية فيها قائمة المحلات و ساعات العمل و الخرايط وكيف توصلولها

أما المطاعم في تطبيق ( آب , أبليكيشن ) اسمه فورسكوير Foursquare تكتبي اسم المكان يطلعلك فروعه و صور عنه رقمهم ساعات العمل و الخريطة و نافيقيشن أكثر تطبيق اعتمد عليه في حياتي مو بس بالسفر حتى في جدة لمن ابغى اروح مكان اول مرة اروحه اكتب اسمه واقرا تعليقات الناس و افضل الاطباق و صور الاطباق وكل شي



اذا عندكم اي اسالة او استفسارات اتفضلوا   ♥

You Might Also Like

3 comments

  1. يعطيك العافية حبيبتي . اسفة ممكن سوال غير جيد . بس دائما اثق في ايش شي تقولينه .

    عندك رقم تاكسي او شي كذا موثوق هناك ؟

    ReplyDelete
    Replies
    1. الله يعافيكي
      والله للاسف ما اعرف احد مواصلاتي كانت عامة واي تاكسي اطلع معاه ما اتعامل مع احد محدد

      Delete
  2. Very nice and helpful post �� Cant wait to visit Turkey .. Keep it up girl

    ReplyDelete