Back To School Report العودة للدراسة ( بنات الجامعة )

Tuesday, August 25, 2015





التوبات
خلي دايما عندك الاساسيات من قميص ابيض , قميص جينز ,  تي شيرتات على حسب الي يناسب جسمك شخصيا افضل الLinen cotton شكلها مرة احلى من القطن العادي و احب القصة السبعة من الصدر احسها more stylish من المدورة تلاقيهم في كل المحلات و البراندز زي اتش اند ام و فوريفير 21 خدو الوان قد ما تقدروا تجي سعرها رخيص و الfit حقها حلو و تقدرو تلعبو فيها بالاكسسوارات . الأساسيات تسمحلك تلعبي زي ما تبغي وتغيري باللبس تضيفي vest تضيفي بلوفر, سلاسل, كولار , بكل سلاسة.
ممكن تلبسي سويترات في ايام البرد ! في اشكال كثير حلوه في المحلات.
من القطع الحلوة كمان البوكسي شيرت خصوصا بالنص كم !! شوفوه بالصور 

college tops

التنانير:
لا تكتري منهم وركزي لمن تشتري في الاكسسوارات و القطع الي فوق خلي تنورة القطن السترتش الي في زارا لونين مثلا بس احرصي انها ما تكون ماسكة مرة لاصقة ولا تكون قصيرة مرة وما تبين الاندروير و اختاري تنورة تانية من خام ثاني و من فترة لفترة خدي قطعة واحدة تكون على الموضة وما تكون بسعر غالي لان القطع الموضة ماتقدري تكرريها كثير. 

الشنط : 
عشقي الأبدي المؤبد اول شي لازم نعرف ايش مميزات شنطة الدوام سواء للطالبة او الموظفة :

  • لازم يكون حجمها يكفي مستلزماتك 
  • لازم يكون فيها على الاقل جيب واحد 
  • اختاري شنطتك لها حبل ع الكتف دايما والا راح تتورطي لانها لازم تكون ثقيله فماراح تكون مريحة ليدك
  • من الافضل تكون جلد لانه بالجامعة و الكرف اليومي حاجا ت ممكن تنكب و حاجات ممكن تجي عليها فالجلد سهل تنظيفه تمسحيه وتروح الوساخة عكس القماش تبهدلك
  • فرقي بين الشنطة و الكيس ,, الاكياس البلاستيك الثقيلة حقت هارودز و تيد بيكرهي اكياس تشيلين فيها حاجاتت اكسترا ما كفشت شنطتك تشيلي فيها اكلك قهوه اي شي بس ماهي شنطة ابدا
  • شنط البحر ما تنفع للجامعة ايش هيا شنط البحر ؟ عادة تكون مصنوعة من القش , من قماش يخشخش بوليستر ما يمتص موية ,وممكن تكون من جيلي وبلاستيك
انا ايش كنت اسوي ؟ اشتري شنطة واحدة بس غالية و الباقي اغير من الماركات الي هي زارا , ريفير ايلند ...الخ عشان لا اضطر كل مرة اشيل نفس الشنطة فلا تحطوا فلوسكم كلها في قطعة واحدة فاشن از فن ولازم تستمعي بالتغيير وكل مرة تلبسي حاجة مختلفة احلى الايام في الجامعة و اكتر لحظات حلوة لمن تصحي الصباح متحمسة وتلبسي اشياء حلوة مودك كله يفرح و يتغير 

college bags




الي يلبسو بناطيل :
اول حاجة لازم تعرفوها انه الليقينق ماهو بنطلون ما ينفع ابدا يتلبس لحاله ع الاقل مع بلوزة طويلة تغطي اكبر قدر ممكن لكن في الدوام مو مقبول ابدا ابعدوا عنه و الكلام ينطبق كمان على بناطيل التراك سوت و ملابس اللاونج الي هيا تجي واسعة و قطنية الي نلبسها في البيت و النادي . بليز ماهي للدوام ابدا ! صح الدوام في الجامعة الواحدة تبغى تلبس شي مريح و سبورتيف بس برضو لازم نفرق بين الي يصلح وبين الي لا.


الخامات : 
أهم حاجة تبتعدوا عن اي خامة شفافة و عن اي شي جوبير او دانتيل او مطرز او بفصوص و كرستال لانها مخصصة للسهرات

الاكسسوارات:
هنا لعبتك مافي شروط ولا حدود بس ابتعدي عن المبالغة , خلي عندك كم قطعة دايم بحلقك تميزك سلسلال نحيف و خفيف او اثنين وخلي عندك قطعة تغيرلك اللوك اختاريها من محلات رخيصة زي توب شوب و اتش اند ام عشان تقدري تغيري وتبدلي وما تكرري كثير.
نقطتين مهمة:

  •  الآيس كاب ما يتلبس عندنا ابدا ممكن لو في القطب الشمالي بس لكن السعودية وجزيرة العرب و الحر لا و ألف لا
  • الخلخال الي يسوي صوت مرفوض باي مكان حتى مو بس الجامعة لانه مو راقي 
ff


النظارات:
روحي المحل بنفسك ولا تشتري اون لاين جربي اكثر من شكل وخلي معاك احد تستشيريه لا تخافي تطلعي من دائرة راحتك و اختاري حاجات منتي متعودة عليها وجربيها ممكن تطلع مرة حلوة عليكي ولا تختاري نظارة موضة ومنتشرة الا لو عادي عندك نص الجامعة زيك عن نفسي ماكنت احب كنت دايما اتميز بشي غير عن الباقيين ايامي كانت الراي بان المرايا متفشية ماقدرت البسها ابدا لاني كنت احس نفسي نسخة من الباقيين.
لا تلبسي النظارة في الأماكن المغلقة وداخل الكلاسات ابدااا الشي هذا مرفوض .ما كفاكي الوقت تسوي حواجبي ولا تخفي هالاتك؟ مو عذر ابدا النظارة صح انها اكسسوار و قطعة حلوة و تحلي الواحدة اذا اختارتها صح بس في النهاية غرضها الحماية من الشمس فانك تلبسيها داخل الكلاسات و في الأماكن المقفلة مو أمر مو مقبول أبدا.
ممكن تضيفي لمسة خاصة لنظارتك باضافة حبل اكسسوار.

f


الجزم:
الخيارات في السوق كثيرة جدا و لحسن الحظ الان موضة السنيكرز (الجزم الرياضية) فاستغلي هذي الموضة قد ما تقدري, وكمان موضة السليب اون شوز و غيرهم .
ممكن تلبسي صنادل فلات بس في حالة انو اظافر رجولك مرتبة ومزبطة اما نص و نص ما يمشي !
لا تنسي جزمك لازم تكون نظيفة ولا لاتلبسيها مافي حاجة اسمها مشي حالك انتي بنت ومظهرك يمثلك
الاشياء المرفوضة الكعوب و الأبوات و الزنوبة !! ما اتوقع يحتاج اشرح ليش lol


shoes for college



الBra : 
اختاري البرا حقتك على حسب لبسك بما انه لبسك حيكون أغلبه قمصان و تيشيرتات و قطع كاجوال ااختاري قصة السنتيانة المناسبة و اختاريها من القطن ومو عشانها قطن يعني لازم تكون مافيها باد او حشوة عادي ممكن تاخديها بش اب ممكن بحديدة ممكن بدون على حسب احتياجك بس بالقطن يمتص العرق و عملي للاستعمال اليومي و اشتري ال3 الوان المحايدة ابيض , اسود , لحمي راح تفيدك كثير كثير كثير.
ولاتنسي اهم قاعدة انك ما تبيني ملابسك الداخلية مهما حصل ومهما سار ومهما كانت الظروف مو حلو نشوفها سواء من تحت اللبس او طالعة من اي منطقة او فتحة.
في بعض البنات يلبسو ملابس فاتحة ابيض مثلا ومن تحت Bra فسفوري ! هذي الحركة في البحر بس لكن في الدوام مرفوضة ماهي مقبولة ولا تبينك بمظهر جيد 

العباية :
الالوان الفاتحة حلوه ومنعشة في النهار بس اذا كنتي تفضلي الأسود انتي حرة اختاري قماش عملي ما يتكرمش لانك ممكن تحطيها جوت شنطتك او تضطري تكرفسيها جوت لوكر وابعدي عن الفصوص و الكرستال و القطيفة لانها تناسب الليل ما تناسب النهار ابدا ودايما خليكي حريصة انو عبايتك مكوية و نظيفة ومافيها اي بقع و الطرحة كمان نفس الشي.

الكوي :
 لبسك لازم يكون مكوي دايما تحت اي ظرف مافي ابشع من منظر الواحدة وهيا مكرمشة تحسي انها صحيت من النوم طلعت من السرير ع الجامعة عدل .


الميك اب :
شخصيا ما احب الواحدة كل يوم تحط فونديشن مهما كان يضر البشرة انك تحطين فيها كل يوم الا اذا انتي تهتمي فيها اهتمام مو طبيعي ممكن. المهم اني افضل مكياج الجامعة يعتمد على كونسيلر اذا عندك هالات , ترتيب حواجب , ممكن هاي لايت تحت الحاجب , روج او مرطب , المسكرا مهمة تفتح العين , الاي لاينر مسموح بس ما ينمط للإذن وقتها هنا نزعل من بعض , بلش او برونزر اما الهاي لايتر ما احس يناسب تسيري تبرقي وتلمعي مع الصبح !
و تركيب الرموش مرفوض واللهي منظهرها سيئ جدا حتى اكتنشن الرموش للاسف مع نور الشمس يبين الغرا حقتها وتلمع ومنظر انتي في غنى عنه ! 

الشعر :
اهتمي في شعرك لا تداومي بيه منكوش ابدا استثمري شوية من وقتك بالليل او اصحي بدري وزبطيه واذا ما عندك وقت سوي علاج لشعرك سواء كيراتين امازون ولا كيراتين ديورا ولا بروتين ولا اي حاجة تخلي تسريحك له سهل , البفات و النفخات و الحركات الصعبة ما تصلح للدوام ولا الحشوات و الاكستنشن والموضوع يشمل السبراي كمان!
في تساريح بسيطة تصلح للدوام وحلوة هنا كم صورة كـ inspiration لك من موضات السنة 


موضات حالية ممكن تستفيدي منها :


  • الجزم الرياضية نايك سارو ينزلوا الوان تجنن ! و اديداس كمان نزلوا كل درجات الالوان على الشوز الرياضي الكلاسيك حقهم
  • ستكرات الشنط
  • ميداليات الشنط 
  • سليب اون سنيكر


Randoms :

  • دايما دايما دايماااااااااا خلي اظافرك مرتبة ونظيفة
  • لا تداومي بمناكير مقشر لو على جثتك
  • دايما ريحتك لازم تكون حلوة و عطورك خفيفة تناسب النهار اي شي ثقيل بليز save it للمساء 
  • واقي الشمس مهم عشان بشرتك بكرة حتندمي اشد الندم لم تتجعد بشرتك بسرعة ولمن بشرتك تسير مبقعة
  • احرصي انو حواجبك و شعر وجهك دايما مشيول و نظيف الشمس تبين كل نقطة افضل حاجة انك تعلمي نفسك كيف تتخلصي من الشعر الزايد عشان لا تروحي الصالون كل شوية او خليلك زيارة شهرية للصالون تسوي فيها اضافيرك و تتخصلي من الشعر الزايد في وجهك

نصائح عشان ترتبي نفسك و حياتك :


  • البلانر او الأجيندا مرة مهمه تساعدك تنظمي نفسك و حياتك و اوقات اختباراتك وتسليم المشاريع و البرزنتيشنات ...الخ لا تستهوني فيها اشتري بلانر ولا تعتمدي ع الجوال في دا الشي من تجربة شخصية الجوال دايما يضيعني و الحاجات تنمسح بالغلط و بعض الاحيان يخرب الجوال وحياتي كلها تضيع فمافي زي الورق 
  • خلي مستلزماتك كاملة من اول يوم عشان لا تضطري تاخدي من احد 
  • افضل قلم كان يريحني وقت الجامعة الي فيه 5 الوان و مرسام خلاص قلم واحد ما يسبب زحمة 
  • كتبك اشتريها من البداية لا تتاخري وخلي معاكي ستيكي نوت عشان تكتبي حاجات اضافية صدقيني لمن يكون كتابك معاك من البداية ومستلزماتك كاملة ما تحتاجي لاحد كل شي بيكون عندك كامل وما حتضطري انك تسالي احد وقت الكويزات و الاختبارات
  • اصحي قبل الدوام بوقت كوافي او جهزي اغراضك من الليل ونامي لاخر قطرة الخيار لك 
  • لا تاجلي عمل اليوم لبكرة وذاكري للكويزات اول باول راح تسهل عليك الMidterms و الفاينلز مرررررررة
  • خليكي ايجابية و ابتعدي  عن الناس السلبيين الي بس يشتكوا 24 ساعة ماراح يجيبولك الا الاكتئاب انتي بيدك تكون التجربة هذي مريحة وسهلة ومفرحة لك وبيدك تكون اتعس ايام حياتك وظفي طاقاتك في المكان الصح خليكي الأفضل واسعي انك تكوني الأفضل دائما لانك تستحقين و تستاهلين دايما انشري سعادة حولك وطاقات ايجابية و حبي الخير لغيرك زي ما تحبيه لنفسك لانه بالطريقة هذي ربنا حيوفقك والكل بيحبك و يسعد بوجودك خليكي مصدر الهام للي حولك اذا انتي مو انسانة حقت صباح وتحبين السهر و النوم عادي مو عيب حاولي توجدي شي يفرحك بالصباح يغير جوك مثلا انك تسمعين اغانيكي المفضلة ع الصبح و تشربي قهوتك الي تحبيها اقري quotes ومقتبسات تشجعك و تفرحك في بداية اليوم راح تعطيكي دفعة و تغير مزاجك 
  • انا كنت اعاني من اني احب القهوة وما يمديني اشتري الصباح لاني احب انام لاخر قطرة فايش سويت سرت اشتري من القهوة ال3 في 1 الجاهزة واحطها جوا الكوب الحافظ للحرارة و اخليها جمب الغلاية اصحى الصبح اشغل الموية بس واحطها بالكوب و انزل 
  • دلعي نفسك اشتري مستلزمات باشكال حلوة وفايلات اشكال لطيفة صح منتي طفلة خلاص بس برضو الواحد عينه تحب تشوف الشي الحلو وفي حاجات كثير مناسبة لعمرك ومرحلتك ماركات كثيرة زي كيت سبيد و Bando و غيرهم ينزلو فايلات , اقلام , نوت بوكس, ستيكي نوتس ...الخ بشكل لطيف يحمسك انك تستخدميها

You Might Also Like

2 comments