Fashion Terms Series Part 1 مصطلحات في الأزياء و معانيها الجزء الأول ( الفرق بين قطع الآوت وير من جاكيتات وكوتات )

Monday, July 13, 2015


 السلام عليكم 

كيفكم بنات ؟ 

لاحظت كثير ما يعرفون مصطلحات او اسامي قطع معينة فلمن يجون يدورون عنها اون لاين او يبغون يسالون عنها بمحل يلخبطون

 بالاسم و ما يعرفون الفرق وخلت الموضوع دا في بالي البلوقر أمل من TerTer Thinks

فقررت اني اكتبلكم عن هذا الموضوع و نقارن بين اسامي القطع عشان نفهم اكثر و نتثقف أكثر 

في الجزء الأول  حابة أتكلم عن الآوت وير بالعموم الآوت وير Outwear يعني اي قطعة تنلبس فوق اللبس 

يعني لابسة بلوزة و بنطلون وحاطة فوقهم قطعة اضافية كبليزر او كيب او بونشو او كوت او ترنش كوت ... الخ 

راح نتكلم عن قطعة قطعة وايش اسمها وكيف تميزيها عن الثانية 



بليزر Blazer
أول و أشهر قطعة بآخر 5 سنوات البليزر هي الجاكيت الي ما يعتبر كثير رسمي غالبا يجي مفتوح او بزرار واحد يجي  مصنوع من قماش خفيف يكون جزء من الoutfit أو الزي مو زي الكوت الي يتفسخ لمن تدخلي مكان دافيء وما يتلبس الا برى البيت ما ينفع
Indoor




























 بومبر جاكيت Bomber Jacket 
البومبر جاكيت هوا جاكيت التسعينات يجي بسحاب او سوسته من الأمام و مطاط عند حده السفلي و الأكمام فيعطيه فوليوم و يكون منفوخ وقصة الياقة تكون مدورة هوا بالأساس طوله يوقف قبل الحوض لكن مع التجديدات في الموضة الأيام هذه نلاقي منه النسخة الطويلة شوي و الكروب القصير



















 بايكر جاكيت Biker Jacket


البايكر جاكيت يرجع اصله لموتورسايكلرز يعني الناس الي بتركب دبابات لانه كان خاص فيهم جا تصميمه عشان يحمي اغراضهم لمن يمشو في الهواء الطلق فتصميمه جاي بسحابات سميكة قوية قصته بطريقة اللف و فيه أزارير حديدية تمسك الياقة مكانها اذا مشيوا بسرعة بالدباب ما تضرب في وجههم بعد كدا سار التصميم هذا مشهور و ساروا مصنعي الأزياء يسووه بطرق مبتكرة و اقمشة أخف عن الجلد بس عموما هوا قطعة تعتبر شتوية وللآن مشهورة بالجلد و الشامواه أكثر شي 



























 سويتر Sweater
 مختلفة عنهم شوية لان غرضها التدفئة تكون مصنوعة من الصوف او الوبر فتكون محبوكة باليد او المكينة ويكون سعرها أغلى منهم



























Sweatshirt سويت شيرت
 السويت شيرت هوا نقدر نقول يشبه البلوفر في انه يتلبس من الراس ماله سحاب او ازارير ولا ياقة بس تكون قصته واسعه و مصنوع من القطن الثقيل و مبطن بالقطن من الداخل او اي قماش ماص للعرق بدا لبسه للرياضين عشان يحفز انهم يعرقوا وبنفس الوقت يمتص العرق بعد كدا زيه زي اي قطعة ملابس اتطورت من دور الازياء وسارت للجميع يعتبر كاجوال كمان 



























Hoodie هوودي 
الهودي ببساطة هي سويت شيرت بس بقبعة من الخلف زي اللبس المغربي وممكن تكون مفتوحة من قدام بسحاب عكس السويت شيرت





























 Cardigan كارديغان 
 هوا شكل من اشكال السويتر بس مفتوح من قدام ممكن بازارير او لا



























Kimono كيمونو 
الكيمونو هو لبس تقليدي ياباني بس في الفاشن الحديثة اليوم الكيمونو سارت ترمز للقطعة المستوحاة من الكيمونو الياباني فاخدت من تصميمها العرض وانها مي مخصرة و الكم الواسع الياباني ومفتوحة بدو ازارير او سحابات او اي شي يقفلها و تتصنع من اقمشة خفيفة زي الشيفون










Trench Coat ترنش كوت
 الترنش كوت هو كوت ضد المطر مصنوع من خامات ما تسمح للموية توصل تحته بقصة عسكرية في الشكل فنلاقي فيه تفاصيل من الكتف تشابه تفاصيل البدلات العسكرية و الجيوب فيه عميقة نفس اللبس العسكري ويكون بازرير و سحابات تقفله لانه الغرض منه يغطي و دايما معاه حزام ويكون مخصر طبعا شكله اتطور كثير اليوم فممكن نلاقي الشكل اتغير  


























 رين كوت او رين ماك  Rain Coat or Rain Mac
الرين كوت او كوت المطر و بعضهم يسميه رين ماك من اسمه كوت يحمي من المطر فيكون مصنوع من بوليستر مضاد للماء و يعتبر قطعة عملية ماهي fashion piece غرضها عملي 100% و غالبا يكون لها قبعة عشان الواحده تغطي راسها اذا نزل المطر و بالأكيد تكون مقفلة بأزارير او سحابات













Parkas
الاسم هذا شوي غريب هو كوت يلبس بالمناطق الباردة جدا او المثلجة يجي مبطن بفرو و فيه هوودي او قبعة وكمان مبطنة فرو عشان تدفي الوجه


























Cape
الكيب يعتبر نوع من القصات لانه ممكن يكون فستان كيب ممكن يكون جاكيت او جلابية بس دام احنا نتكلم عن الجاكيتات خلينا فيها المهم انها قطعة تكون واقفة ع الكتف وبدون أكمام وقصتها مدورة































Poncho
يشابه الكيب كثير بس الفرق انه قصته مربعة و غالبا يجي شال يتلبس من الراس ماله قصة أكمام كانه موصل ببعض ومخيط بس
























Puffer Coat
الكوت الي شكله كانه منفوخ هواء بس هوا بالحقيقة منفوخ خام خفيف جدا يدي دفء لكن بوزن خفيف جدا و يجي في خياطات على شكل مربعات على كامله


 




















Double Breasted Jacket or Coat
الدبل برستيد يعتبر نوع من انواع القصات ممكن يجي في شكل كوت او جاكيت او بليزر كيف هذه القصة ؟ تجي عريضة مو مخصرة على شكل لف جزء فيهم يغطي ع التاني ويتقفل بازارير بطريقة اللف برضوا ممكن شرحي يكون مو مرة واضح بس اتوقع الصورة توضح اكثر












You Might Also Like

6 comments

  1. حبيت البوست ومفييد لكثير بنات
    يعطيك العافية ياعسل ...

    ReplyDelete
  2. الله يديك العافيه
    توني اعرف اغلب المسميات
    دائما بوستاتك مختلفه

    ReplyDelete
  3. I read best Post
    thank you very much.

    ReplyDelete
  4. اجمل بوست قريته
    يعطيك العافية

    ReplyDelete
  5. اجمل بوست قويته يعطيك العافية

    ReplyDelete
  6. تارتاتاتات

    ReplyDelete