Review : Soap And Glory Products ريفيو : كل منتجات سوب اند قلوري الي جربتها

Friday, June 19, 2015






Soap And Glory Hair Turban
 أول منتج راح أتكلم عنه هو من أهم الاشياء الي جربتها وعجبتني اللي هيا منشفة الشعر او توربان الشعر المايكروفايبرالنوع هذا من المناشف  يقال انه ينشف الشعر اسرع و يقلل من نفشة الشعر فحبيت اني اجربها خصوصا ان شعري طويل ويبلل البيت كلو و المنشفة العادية ما تؤدي الغرض فما لقيت موجود بالسوق الا منشفة سوب اند قلوري الجميل في منشفة سوب اند قلوري تصميمها فيه زرار من الخلف يسمحلك انك تقفلي المنشفة وتثبت مكانها دون ما تتحرك. استعملها فترة طويلة فاقدر احكم عليها الآن.

مميزاتها :

  • فعلا تنشف الشعر بسرعة
  • ما يتوسخ المكان بالموية ما ينقط منها شي
  • تصميمها مريح اقدر ادور ف البيت و اسوي شغلات كثيرة ما تتحرك ولا تتفك
  • غسلتها مرة كثير في الغسالة ولسا بنفس النعومة

مساوئها :

  • تمسك ريحة سيئة لاحتباس الماء فلازم اعصرها مرة كويس و اتركها في مكان مفتوح بعد كل مرة انشف فيها شعري 

سعرها : 75 ريال




Sugar Crush Body Scrub

المنتج هذا اخذ ضجة كبيرة و الكل اتكلم عنه مكوناته جدا مغرية ومفيدة فيه ليمون , ملح البحر , زيت اللوز , سكر بني مطحون , زيت الماكاديميا , جلسرين , و مسك الفانيلا. طبعا نلاحظ المكونات هذي خليط الي فيهم يقشر و ينعم واللي يبيض و اللي يرطب. 
طريقة استخدامه عادية في الشاور تاخدي كمية في القلفز و تفركي بيها جسمك بعد كدا تغسلي عادي مع التكرار راح تلاحظي بشرتك سارت انعم بكثير وفعلا لاحظت هذا الشي ما شفت تفتح بس شفت نعومة و ترطيب مرة حلوة.

مميزاته :

  • يقشر الجلد الميت
  • يقلل من الحبيبات و الشعر تحت الجلد لانه قوامه خشن فيزيلها
  • يرطب البشرة
مساوئه :
  • كثير حبوا ريحته بالنسبة لي ريحة غير محببة تشبه ريحة الحمام المغربي بالأعشاب
سعره : 120 ريال




Feel Good Factor Translucent BB Cream SPF25

يقال انه مرطب و برايمر و بيبي كريم موحد للون و واقي شمس و سيريم ومدعم ومعزز للبشرة و كمان فيه فيتامين سي و اي فالبتالي مضاد أكسدة. الصراحة يوعد بأشياء كثير و بالنسبة ليا ما يسوي ولا شي منهم للأسف ما حبيته لا كبرايمر ولا بيبي كريم احسه طبقة كريمية ثقيلة تلمع وجهي وبس ما شفت اي تعزيز ولا نعومة ولا طبقة تسهل دمج الفونديشن ولا شي كاني حاطة كريم مرطب جسم في وجهي للأسف.


The Righteous Butter Body Butter

الزبدة هاذي فازت بجوائز كثيرة من مكوناتها زبدة الشيا و الصبار مرطبة ومغذية ومعطرة بالريحة الsignature الخاصة بسوب اند قلوري مرة احبها اتكلمت عنها قبل كدا في مفضلات شهر مايو هنا .

مميزاتها :
  • ترطب ترطب ترطب من قلب يعني مرة واحدة بعد الاستحمام كافية ممكن تظل أيام
  • ريحتها جميلة مو طبيعية اول ما افك الغطا تنتشر في كل الغرفة ريحة أنثوية جدا 
  • كميتها جدا كبيرة تدوم معاك فترة طويييييييلة جدا 

مساوئها:
  • بالنسبة ليا ولا شي بس ممكن انه لمن جربت الميني سايز منها ماكان جيد نفس الكبيرة ما اعرف ليش
سعرها : 135 ريال



The Righteous Butter Body Lotion 

المرطب هذا برضو حائز على جوائز كثيرة منها جائزة مجلة ELLE كأفضل منتج ترطيب حجمه جدا جدا كبير نص لتر تقريبا غني بزبدة الشيا و الكاكاو و زيت اللوز و الصبار و فيتامين إي غير انها فيه مكونات عطرية كمان زي خشب الصندل و الفانيلا و الخوخ الي هي بعض مكونات ريحتهم البنك المشهورة هوا تقريبا نسخة من الزبدة الي اتكلمت عنها فوق بس على هيئة لوشن ضغاط أخف من الزبدة بس يعتبر لوشن ثقيل شوية لكن بالنسبة ليا ممتاز ممكن يكون مشكلة للناس الي تحب الخفيف بس أنا ما احب , احب الشي الي أحطه يدوم لأني شوية كسولة ومو كل شوية حرطب.

مميزاته :
  • يرطب بعنف 
  • كميته كبيرة جدا جدا 
  • رائحته جميلة
  • مكوناته رغم انها عطرية لكنها مفيدة كمان 
مساوئه :
  • ولاشي بالنسبة ليا 


GirliGo Spray-on Body Moisturizing Mist 

هذا ببساطة المفروض انو يكون لوشن الكسلانين لوشن خفيف ينبخ على الجسم و المفروض ان البخاخ يكون اسهل من انك تضغطي وتفكري لوشن بجسمك بس صراحة انا لقيته نفس الشي حتى البخاخ حضطر افكره في جسمي وماينفع ع السريع هوا هوا ما ساعد في دي الناحية ممكن لو غيروا الباكيج خلوه اسهل و حسنوا البخاخ بحيث انه يبخ كمية موزعة من المنتج يفيد لان الي يبخه الان تحسوه مركز في نقطة واحدة مو بخاخ متناثر في منطقة واسعة أتمنى تكونو فهمتوني غير هذا كله ترطيبه سيء جدا يدوم ساعات قليلة جدا .

سعره : 75 ريال


Glow Getter Bronze Spray

البخاخ هذا سيلف تان مؤقت ميك اب يعني و يدي قلو مرة حلو للبشرة ويروح بمجرد الإستحمام مو صبغة دائمة لا مجرد ميك اب درجته جدا جميلة و تناسب بشرتي اتكلمت عنه قبل كدا هنا  والى الان عاجبني وما غيرت رأيي عنه هوا من المنتجات الي تنشف بسرعة كمان فلو كنتي زيي دايما متأخرة ومكياجك و شعرك يادوب تخلصيه على آخر لحظة ومناكيرك تحطيها وانتي في السيارة هذا منتج مناسب لك راح تبخي ع السريع وتوزعيه باسفنجة او قطعة قماش ناعمة او بيدك وما راح يوسخلك ملابسك لانه ينشف بسرعة جدا . الآن اتوقع غيروا التعليب حقه سار لونه بينك فممكن ما تلاقوه بنفس هذا الشكل الي بالصورة.

مميزاته :
  • ينشف بسرعة 
  • ما يصبغ بالملابس
  • يتغسل من الجسم بسرعة موية و صابون وينزل كله

مساوئه :
  • الكمية قليلة 100 ملل فقط يخلص بسرعة 
  • لو ما وزعتيه بسرعة راح يبقع 

سعره : 90 ريال




Exfoliating Scrub Gloves 

قلفز للتقشير طبعا لونها أبدا مو كذا ههههههه بس عوامل التعرية و كثرة استعمال المنتجات كان لونها فوشي فاقع بس مدري ايش سار المهم انه من اجمل القلفز الي استعملتها خشن انا احب الاشياء القوية لان بشرتي تتحمل الحمدلله مو مرة حساسة فما أحس بالنظافة الا بشي خشن زي كدا تفكرني بحقت بودي شوب بس لا هاذي أخشن و أقوى ممتازة جدا أنصح فيها.



جربت حاجات ما صورتها لأني رميتها من زمان :


Clean On Me Creamy Clarifying Shower Gel

رغم انه حائز على جوائز مرة ما حبيت هذا المنتج المفروض انه شاور جيل يحتوي على كريم ويمكن عشان كذا ما حبيته انا افضل الرغوة الكثيرة فبالنسبة ليا هذا المنتج إكس كبير ما صدقت خلصته و رميته .


Hand Food Greasy Hydrating Hand Cream

على قد ما سمعت مدح عليه انه ترطيبه يدوم و ريحته حلوه صراحة بالنسبة ليا كان عكس كذا تماما لا ترطيب يدوم ولا ريحة حلوة فكان صدمة بالنسبة ليا ومن المنتجات الي خلتني ازعل و اخد انطباع سيئ عن البراند وبطلت اشتري منهم لفترة.



Flake Away Body Polish

 هوا تقريبا مقشر يحتوي على زبدة الشيا و وزيت اللوز الحلو وبذور الخوخ وملح البحر و السكر بريحتهم البنك المشهورة مع اني ما حسيتها كثير واضحة في هذا المنتج وللأمانة ما حسيته يقشر أبدا وما عجبني ولا نقطة حتى لا يقارن بسكرب الشوقار كرش أبدا أبدا أبدا هذاك قوي و يقشر من قلب أما هذا تأثيره التقشيري خفيف جدا جدا يمكن ينفع للبشرات الحساسة الي ما تتحمل المنتجات القوية .


وبكذا أكون خلصت الرفيو وعلى فكرة المنتجات هاذي أستخدمتها أكثر من سنة يعني الريفيو مبني على أساس شخص مستعملها لمدى طويل جدا !

قولولنا رأيكم 

Instagram : Ghadeers_alsh
Twitter : Ghadeer_alsh

You Might Also Like

1 comments